EDITORYAL – Tabangi ang kapolisan

Ang mga opisyal sa kabarangayan dinhi sa dakbayan sa Sugbo gihatagan og dugang honorarium sa City Hall aron moaktibo sila sa pagserbisyo, ilabi na sa kampanya batok sa mga tigpayuhot og ilegal nga drugas.

Apan daghan kanila, apil ang mga opisyal sa Barangay Duljo-Fatima, nagkyugpos lang sa grabe’ng problema sa ilegal nga drugas diha sa ilang lugar.

Kun mangangkon si Kapitan Elmer Abella nga aktibo sila sa kampanya pagsumpo sa pagpayuhot og gidili nga matang sa drugas diha sa ilang dapit, angay nga mopakita siya og kamatuoran niini.

Tinuod, ang mga tawo nga namaligya og shabu, ilabi na ang druglord nga nag-operate sa Duljo-Fatima, ilang mga kaila apan isip mga opisyal angay sila nga motuman sa gipanumpaan nila nga katungdanan.

Sa pag-asumier nila sa katungdanan, nanumpa ang mga opisyal nga mohimo sila sa takus nila nga pagpangalagad ug pagpatuman sa mga balaod sa wala’y pag-ukon-ukon.

Apan hain na man ang ilang gipanumpaan? Ngano nga gipasagdan ra man nila ang mga ilegal nga kalihukan diha sa ilang barangay?

Dili makabasol ang mga opisyal sa Duljo-Fatima ug ubang kabarangayan, nga magduda kanila ang katawhan nga nagdawatan sila og suborno gikan sa druglord.

Bisan gani si Mayor Michael Rama nagduda g’yud kun ngano nga nagkyugpos ra ang mga opisyal sa barangay. Bisan tuod og wala’y ebidensya, apan hugyaw kaayo ang tabi-tabi nga ang druglord naghatagan og suborno sa mga opisyal.

Aron pagmatuod nga dili kini tinuod, kinahanglan nga sila si Kapitan Abella moaktibo sa pakig-alayon sa kapolisan aron madakpan ang mga tigpayuhot og drugas sa ilang barangay.