Kuwalipikado ba si Grace Poe?

Gipahibawo na ni Senador Grace Poe ang iyang pagpapili sa pagka presidente sa eleksyon sunod tuig.

Apan uban sa pagpapili ni Poe sa pagka presidente, ang pangutana mao ang kabahin sa iyang kuwalipikasyon.

Pagkakaron, ang Senate Electoral Tribunal nagpadayon pa sa ilang pagtuki sa reklamo nga gipasaka ni Rizalito David nga nagkuwestiyon sa citizenship ni Poe.

Una sa mga kuwalipikasyon niadtong magpapili pagka presidente ug bise presidente sa nasud sigun sa 1987 Philippine Constitution mao nga kini natural born Filipino citizen.

Ang Constitution mipasabot nga ang natural born Filipino citizen mao kadtong si bisan kinsa nga gipanganak dinhi sa Pilipinas nga wala na kinahanglana ang paghimo og unsa aron perpekto niya nga makuha ang iyang pagka citizen sa nasud. Usa sa mga natural born Filipino citizen mao kadtong mga anak sa ginikanan nga mga Filipino citizen. Sa ato pa, kun ang imong mga ginikanan Filipino citizen, ikaw pud Filipino citizen.

Si Senador Grace Poe maglisod sa pagpasabot sa iyang citizenship tungod kay wala siya masayod kun si kinsa ang iyang tinuod nga mga ginikanan kay napunitan man lang siya sa nagsagop kaniya sa gawas nga bahin sa pultahan sa simbahan sa Jaro, Iloilo.

Nakadugang pa sa pagkakomplikado sa iyang citizenship mao ang iyang pagka American citizen sa wala pa siya mopauli dinhi sa nasud aron dawaton ang gitanyag ni Presidente Aquino nga siya ang mangulo sa Movie Television Regulatory Classification Board.

Gawas sa kuwalipikasyong legal, gikuwestyon usab karon ang kasinatian ni Poe sa pagdala sa renda sa kagamhanan ug ang iyang pagka itoy ni Senador Chiz Escudero kinsa mao usab ang iyang kandidato sa pagka bise presidente.

Hinuon layo pa ang piniliay busa may igo pa kita nga panahon sa pag-ila sa kuwalipikasyon sa mga kandidato sa pagka presidente sa nasud.