Shabu mugna ni Satanas!

Mao kini ang gibatbat pag-ayo sa sermon sa pari atol sa Santos nga Misa nga akong natambongan didto sa Sanctuary Castle of Mama Mary sa Lindogon, Simala, Sibonga niadtong Septiyembre 13.

Ang mga dautan nga panghitabo kuno naggumikan sa dili maayo nga mga bisyo ug sa kahangol sa mga tawo sa yutan-on nga panginahanglan diin gihulagway sa pari nga mugna sa yawa. Gipaambit sa pari ang tipik sa mensahe nga iyang nasayran mahitungod sa giingon nga Secret of Fatima pinaagi ni Sister Lucia nga nagkanayon, si satanas mogamit sa tanan niyang mahimo aron lang makakabig sa mga tawo pagpalapad sa iyang gingharian dinhi sa yuta.

Matud pa nga mosulod ang yawa dili lang sa lawas sa mga tawo, kon dili, apil na sa mga tanom ug chemicals aron pagguba sa katarong nga iya sa Dios. Ang tanom mao ang marijuana ug ang chemical mao ang mga sagol sa shabu nga maoy miulipon sa mga tawo ug nagtukmod sa pagsabwag sa kaalaotan sa iyang isig ka tawo sama sa sagunson nga mga linuog nga krimen dinhi sa Sugbo. Sa lungsod sa Minglanilla, adunay inahan ug anak gipatay ug gisulod sa septic tank. Unya gisundan kini sa dos-anyos nga babaye nga namatay human gikulata sa iyang ama-ama sa mao gihapon nga lungsod.

Ang mga suspek nga nadakpan mitug-an nga tiggamitan sila og ilegal nga drugas. Niining bag-o lang, gipatay sulod mismo sa ilang pinuy-anan ang 17-anyos nga tinun-an sa koleheyo.

Ang suspek nailhan na  apan nakasibat ug gituohan nga nalambigit usab kini sa illegal drugs. Kun atong patalinghugan ang mensahe sa pari kinahanglan nga molihok usab kita, dili lang kay ang kapolisan ug simbahan. Maghiusa kitang tanan batok sa mga bisyo nga maoy gigamit ni satanas pagsabwag sa iyang kadautan. Labaw sa tanan, gikinahanglan ang hugot nga pag-ampo o prayer of exorcism aron pag-abog sa kontra sa katarong.