Crucial ang 2016 elections

Daghan nang eleksiyon ang milabay sa atong kinabuhi. Sa ato pa, daghan nang mga panahon ang mihatag kanato og kahigayonan nga magmauswagon ang atong nasud. Kini, pinaagi sa pagpili kinsa ang atong palingkuron ug hatagan sa gahum pagdumala sa kagamhanan.

Usa kini ka balaan nga katungod ug kaakohan. Apan, gumikan sa atong pagpasagad sa pagpili, naputos ang gobiyerno sa tumang kahugaw. Corruption dinhi, corruption didto.

Hinungdan nga wala gayud moasenso kining atong nasud. Nagpabilin kita nga kabus.

Sa ato na nga gihisgutan dinhi, ang Simbahan, ang CBCP kon Catholic Bishops Conference of the Philippines, nag-awhag kanato, to vote wisely, nga atong ma-achieve ang responsible voting.

Sa laktud, sa atong kaugalingon, atong isukad ang atong mga desisyon, dili iagad sa mayor o sa gobernador, o sa kapitan sa barangay, kun dili pinasikad sa mga isyu.

Dili popularity, kun dili, sa kaligdong ug katarong sa mga pilionon, ug of course, sa qualification.

Crucial ang 2016 election. Ang resulta magtultol kanato sa atong direksiyon, sa atong padulngan o kun asa kita paingon sa kabulahanan ba o sa tumang kalisdanan.

Busa, hinuktuki ug ayaga pag-ayo ang mga isyu. Paminaw sa imong tanlag, dili ang tanlag sa uban. Kalimti ang imong kaugalingon, think of the country.

Duna pa’y igong panahon nga atong kahimulbolan pag-ayo ang buot magpapili sa umaabot nga eleksiyon. Sugdi karon.