Nakapusta sa kontra

Sa alternative version ni Presidente Aquino kalabot sa nahitabo nga engkwentro sa Mamasapano, Maguindanao nga misangpot sa pagkamatay sa 44 ka sakop sa PNP Special Action Force (SAF) ingon sa susama ra nga iyang gikalot ang lubnganan sa giisip nga mga fallen heroes.

Susama ra nga subli sila nga gipamatay gumikan sa lama sa mga pagduda gikan mismo sa ilang Commander-in- Chief nga mao ang presidente.

Bantog ra nga wala mahisgoti sa Presidente ang Fallen 44 atol sa iyang State of the Nation Address (SONA) kay wala diay siya motuo sa resulta sa imbestigasyon nga gihimo sa PNP mahitungod sa Mamasapano encounter.

Sa gipakita nga lihok sa pangulo, mura’g mituo pa siya sa version ni Mohager Iqbal sa Moro Islamic Liberation Front (MILF) nga ang ilang mga kauban ang nakapatay sa notado’ng terorista nga si Zulkipli Bin Hir alyas Marwan ug dili ang mga sakop sa SAF.

Kinsa man ang angayang tuohan? Ang mga SAF nga nakiggubat sa mga sakop sa MILF ug BIFF o si Iqbal nga wala’y bisan anino nga nakasaksi sa engkwentro?

Makapaduda ang mga aksyon sa presidente nga gihatagan niya og gibug-aton ang version sa kontra sa gobiyerno kay sa iyang mga ginsakpan.

Dili ba kaha tungod kay gusto ni PNoy nga makakabig og suporta sa gitinguha niya nga Bangsamoro Basic Law maong gusto niya nga tuison ang kamatuoran bahala na og isakripisyo ang dungog sa mga namatay nga SAF members?

Basin baya og mosilaob na ang gibati nga kahiubos sa mga kabaro sa mga nakalas nga SAF members. Hinaut lang unta nga dili kini mosangpot sa mga posible'ng kasamok sama sa kudeta sa nahabilin nga pipila ka bulan sa katungdanan sa presidente.