Kontrobersiya sa Parian
Gipanghimakak ni Cebu City Mayor Mike Rama nga pamolitika maoy hinungdan sa iyang pagpanaktak sa mga kawani sa City Hall nga nagtudlo sa mobile schools sa Parian Drop-In Center. Matud niya di siya makapadayon paggamit sa pundo sa City Hall alang sa pribadong institusyon tungod sa pagdili sa Commission on Audit (COA) kay opisyal man sa dakbayan ang tagduma, si Konsehal Margot Osmeña.
Apan mga kawani sa drop-in center nitataw nga hagbay rang nikanaog si Osmeña isip pangu sa Cebu City Task Force on Street Children (CCTFSC) busa way rason si Rama paglaslas sa mga hinabang sa City Hall. Nipasangil sila nga gitaktak ni Rama ang mga magtutudlo tungod sa pasangil nga “Type O” sila.
* * *
Nakakita hinuon si Rama og lab-as nga sukaranan sa pagpanginlabot sa institusyon. Matud niya ang dakbayan ang tinuod nga tag-iya sa luna. Gitataw niya nga kuwestiyonable ang kontrata sa pag-abang sa luna sa drop-in center kay magtiayon ang nipirma--si kanhi Mayor Tommy Osmeña alang sa City Hall ug si Konsehal Osmeña alang sa CCTFSC.
Matud ni Rama susihon pa sa iyang mga abogado wa bay balaod nga nalapas ang magtiayong Osmeña sa pag-unay pagsud sa transaksiyon. Gikuwestiyon sab niya ang kagamay sa abang sa luna, ang orihinal nga probisyon nga P1 per square meter giusab ngadto sa P1 per year.
* * *
Di hinuon malalis ni Rama nga tungod sa Parian Drop-In Center ug CCTFSC, nakaangkon og daghan uyamot nga nasudnon ug kalibotanong pasidungog ang dakbayan nga maoy labing unang local government unit nga nakapasiugda sa labing maayong mga programa pagluwas, pag-atiman, pagpapuyo ug pagpa-eskuyla sa mga bata sa kadalanan.
Apan nipasangil si Rama nga ang kuwestiyonableng sinugdanan sa institusyon mahimong makapa-kuwestiyonable sab sa kinatibuk-ang kalihokan. Nipasidaan siya sa paglusad og hingpit nga kuwentada pila ang kinatibuk-an nga hinabang sa City Hall sukad sa pagsugod sa drop-in center ug giunsa paggasto nilang Osmeña ug ubang kadagkoan sa CCTFSC.
* * *
Andam si Rama pagtabang sa Parian Drop-In Center sa kundisyon nga di kapasanginlan ang City Hall nga nipabor sa usa lang ka kahugpongan. Sa iyang bahin, giawhag ni Bise Mayor Edgar Labella si Dr. Ester Concha, pangu sa Department of Social Welfare and Services (DSWS), pag-imbentaryo sa tanang institusyon nga nag-atiman sa kabataan sa kadalanan.
Gipanalipdan sang Labella ang dinaliang operasyon pagluwas sa 45 ka bata sa mga taytayan sa Mabolo ug Banilad kay naalarma siya sa kahimtang sa mga batang gilambigit sa mga krimen. Si kanhi Mayor Osmeña nipasangil ni Labella nga nagpataka og dasmag. Nipasabot si Konsehal Osmeña nga sa di pa ilusad ang susamang operasyon mas lapad nga pangandam ang himuon ug mas daghang ahensiya ang palihukon aron kapanalipdan ang katungod sa kabataan ug mapahimutang sa mas luwas nga pinuy-anan.
- Latest
