EDITORYAL – PNP vs AFP

Nisamot kalubog ang resulta sa imbestigasyon kabahin sa Mamasapano encounter nga nahitabo niadtong Enero 25 sayo niining tuiga diin 44 ka polis ang nasakripisyo tungod sa gipalutaw karon nga “alternative truth” nga nag-ingong posibleng dili kuno ang PNP-SAF maoy nakapatay sa teroristang Malaysian nga si Zulkfli bin Hir alyas Marwan. Kung di ang PNP-SAF kinsa man?

Kun mao ni, kwestyonable na hinuon ang kredibilidad sa PNP. Ang PNP-SAF maoy nagplano ug naghimo sa operasyon nga matud pa adunay bendisyon gikan sa Malacañang.

Daghan na ang mga estoryang nanggawas bahin niini, kasagaran di maayo sa habig sa PNP ug sa imahe usab sa AFP nga aduna say hurisdiksyon sa Mamasapano. Gisaway sila og maayo, hasta si Presidente Benigno Aquino gustong patubagon sa kamatayon sa maong mga polis.

Ang PNP-SAF gipasanginlang wa mo-coordinate sa AFP sa maong operasyon  mao kuno nga daghang nakalas sa mga polis niadtong tungora.

Ang rason nila, dili kuno kasaligan ang AFP kay dunay mga pagdudang basin mo-leak kini sa kaaway ug maka-eskapo si Marwan. Apan karon, mismo si Aquino nikubit sa maong impormasyon. Bisan wa niya tuyoa, nagdala kini og sayop nga mensahe sa katawhan ilabi na sa mga kabanay sa mga nakalas.

Sa report sa The Philippine Star kagahapon, dunay pagduda gikan sa PNP nga ang AFP maoy nipalutaw niini kay nauwaw sila nga diha ra sa ilang simod nagtago si Marwan.

Nauli-ulian unta gikan sa kauwaw ang PNP sa pagkompirmar sa Federal Bureau of Investigation sa Amerika nga  ang ilang napatay si Marwan gyud.  Kun unsa may motibo sa nipagawas niini, gipukaw nila pagbalik ang katawhan nga nangita og katin-awan bahin sa nahitabo sa Mamasapano.

Apan matapos ba kaha ang maong isyu? Kinahanglang tapuson na kini ug ipadayon ang pagtuki sa Bangsamoro Basic Law kay  murag kini target nga baldahon.