Katilingbanong pakiglambigit (3)

Ang ulahing nahisgutan nato sa miagi’ng lindog, mao ang pagkonsiderar sab sa atong obligasyon sa Dios, nga mas gamhanan makatabang pagpalig-on sa atong panghunahuna aron malikayan ang depresyon.

Ang paghinatagay o pagbinayloay og mga opinion ug  interaksyons sa kaubanan sa simbahan o relihiyon, makatabang ni sa pagnormal sa ‘hormones’ nga ‘cortisol’, kay ang pagtaas sa lebel ini, makadaut sa utok. Sa laktud, kinahanglan permi maglihok nga okupado ang utok sa mga kalihokan.

Angay sab usisahon ang atong kaugalingon, suhiron kun unsa’y atong misyon ngano kita gipakatawo ug unsa’y misyon sa kinabuhi. Kun ato ni’ng matugkad ang katarungan, mopahiluna kini sa hapsay ug tunhay nga kaisipan. Sa mga pagtuon sa 900 ka edaran, adunay nadiskubrehan nga kadto’ng nakabatyag sa kaugalingon sa iyang kapuslanan sa kinabuhi, nagbaton og…

* 2 ngadto 4ka beses nga mas menus ang risgo nga madebelop ang sakit nga ‘Alzheimer’s Desease’ (AD).

* Mas menus usab ang tsansa nga maapektahan sa kahinay o kadaut sa  panghunahuna o ang memorya.

* Mas inanay sud sa 7 ka tuig  o mas dugay mobahar ang panghunahuna, ikompara niadto’ng wala makatugkad o makahibalo sa iyang kapuslanan. 

Kun senior o edaran ka na, nga retirado sa trabaho, ayaw pagretiro sa serbisyo sa katilingbano’ng kalihokan. Iabag o ialagad ang imo’ng kasinatian nga ikaw kapuslan diha  sa pagtabang nga mahimong mananambag diha sa imong komunidad, aron padayon ugnaton o pabaskugon ang malantip mong panghunahuna. Sa ingon malingaw kang madasigon sa imong gimbuhaton.

Matngoni nga di masubraan sa kahago ang imong utok, lawas ug emosyon.