Silent Epidemic!

Kini ang paghulagway sa Department of Health (DOH)-7 regional office sa paspas nga pagkuyanap sa Human Immunodeficiency Virus (HIV) nga kun mapasagdan mahimo nga full blown Acquired Immune Deficiency Syndrome AIDS.

Kamatuoran niini mao ang kamatayon sa 29 anyos nga inahan nga adunay tulo ka anak nga nataptan og AIDS dinhi sa dakbayan sa Sugbo.

Apan ang mas nakapakugang mao ang report nga ang duha niya ka anak, 9-anyos ug 2-anyos, napositibo na usab sa HIV.

Gikompirmar mismo sa Cebu City Health Department nga AIDS ang namatyan sa naasoy’ng babaye kinsa nalambigit sa prostitusyon ug sa paggamit og injectable drugs.

Tuig 2010 pa diay nga na-diagnosed ang babaye nga adunay HIV apan mikagiw kini ug subli lang nagpatim-aw niining bag-o lang nga nagluya na.

Ang sitwasyon sa babaye ug sa iyang mga anak nagpakita sa ka seryoso sa problema. Sa rekord sa DOH, ang dakbayan sa Sugbo maoy nag-una sa tibuok nasud sa mga Injecting Drug Users (IDU) nga nataptan sa HIV.

Samtang ang lalawigan sa Sugbo usab ang ikaduha nga adunay labing daghan nga kaso sa HIV-AIDS ug padayon ang pagsaka sa kaso sa makatakod nga sakit.

Dili kini basta-basta nga problema ug angayan gayud nga tutokan dayon sa atong kagamhanan.

Sa akong nabantayan taphaw ra ang gihatag nga pagtagad sa gobiyerno sa pagtubag sa naasoy’ng problema sa katilingban dili kay kutob ra sa pagpahigayon og awareness campaign nga hilabihan ka huyang nga dili man lang makapiog sa nag-uros-uros  nga kaikag sa mga tawo nga hangol sa tawhanon nga kalipay.

Mentras dili pa ulahi ang tanan, kinahanglang magtambayayong ang tanan ma-gobiyerno man o yano nga sibilyan, aron dili hingpit nga mahimo’ng "AIDS City" ang dakbayan sa Sugbo.