Life jacket sa mga pasahero

Sa miaging semana, misakay ko sa ferry boat nga magbiyahean sa Pier 3 sa dakbayan sa Sugbo paingon sa Muelle Osmeña sa Lapu-Lapu City, vice versa.

Kadto pa ko makabalik og sakay sa ferry boat human sa taudtaod nga pagbakasyon. Sa akong katingala kay nag-iyahay pagsul-ob ang mga pasahero og life jacket nga akong tan-aw gikapalan na gani sa buling ang maong mga life jacket nga dili na gani dutlan og daoban.

Sa kainit sa panahon niadtong tungora pasul-obon og life jacket ang mga pasahero? Misantop sa akong hunahuna nga ang maong kasugoan naggikan g;yud sa MARINA o sa Philippine Coast Guard.

Karon na lang kini nila buhata? Kun wa mahitabo kadtong pagkalunod sa bangka nga de-motor gikan sa Ormoc paingon sa Camotes Island diin daghan ang nangamatay, wa nila pasul-oba og life jacket ang mga pasahero sa ferry boat sa Mactan Channel?

Mao kana ang naka “apan” kay unya na manguros human sa kilat. Wa’y dagko nga bawod sa Mactan Channel gawas sa fast craft nga moagi nga makamugna’g dagkong bawod.

Hinugay na niining tanan. Pagpakabana nga wa’ sa lugar. Hinuon, gikinahanglan kaayo nga mangandam kanunay ang mga pasahero sa bisan unsang matang sa sakyanan nga iyang sakyan sa panahon nga adunay importante nga mga lakaw. Sa mga sakyanan sa kayutaan, kadagatan ug kahanginan nag-atubang og dako nga risgo. Duha ra ka butang ang padulngan sa tawo -- kinabuhi ug kamatayon.

Kay bisan sa imong pagpangaliya nga luwas ang imong panaw, dili kalikayan nga adunay motumaw nga mga kakulian nga mobabag sa imong dalan.

Pananglit, mabangga ang bus nga imong gisakyan, ilabi na g’yud sa eroplano nga nag-utaw-utaw sa kahanginan.

Unya, niay ferry boat, ang management wa’y pagpakabana sa ilang mga pasahero. Imbes magdali ka, nangatanggong na hinuon.

Tiaw mo ba, nga sa akong pagpauli balik sa Lapu-Lapu City, hapit tunga sa oras nga nag-utaw-utaw ang ferry boat kay wa dayon makadunggo sa Muelle Osmeña kay nagpaabot kanus-a makalarga ang nakapundong ferry boat nga nag-asikaso pa kunohay sa manifesto sa mga pasahero.

Ngano nga dili man buhatan og laing dunggoanan aron makakanaog dayon ang mga pasahero? Mura ba og bahala na mo, basta puno kanunay ang sako sa mga sensilyo. Mao tingali ni ang hunahuna sa management.