Nag level up na!

Organisado ug dili basta-basta ang nadiskobrehan nga cyber extortion operation nga gipasiugdahan og mga langyaw dinhi sa dakbayan sa Sugbo.

Kaniadtong Martes, nasikop sa mga otoridad ang 68 ka langyaw nga maoy gitumbok nga responsable sa krimen.

Ang mga nasikop gilangkoban sa mga Taiwanese ug Chinese nga gituohan nga mga sakop sa international syndicate kansang modus operandi ang pagpamiktima sa mga sapian nga kadugo nila sa nasud nga ilang gigikanan.

Gusto nila nga hukhokan og dagko nga kantidad sa kuwarta pinaagi sa cyber technology.

Mas makapaalarma ang ilang mga hideout tungod kay anaa man kini nahimutang sa mga high-end ug exclusive subdivision nga lisud kaayo nga tultolon sa mga ordinaryo nga tawo ug bisan gani sa mga otoridad.

Kini tungod kay mga impluwensyado man usab ang mga nanag-iya sa balay nga giabangan sa sindikato.

Samtang kun nakahimo ang mga langyaw og sama niini ka tago ug high-tech nga krimen, mas dako’ng posibilidad nga ingon niini usab ang gihimo sa uban pa nga mga organisado’ng grupo sa mga kriminal sama sa mga durugista.

Dili nato ikahibulong ngano nga dili man mahurot ang supply sa ilegal nga drugas tungod kay basin anaa ra kini gihimo mismo dinhi sa atong lokalidad kay maka-afford man sila sa pag-abang sa mas high-end ug exclusive village.

Kini ang angay’ng tan-awon sa atong mga otoridad dili lang ang kadtong mga gipangbaligya sa mga slum areas nga maoy sagad mahitabo ang mga buy-bust operation. Kun sa isda pa, mga bulinaw ra ang  ilang madakpan, samtang ang mga higante’ng iho anaa ra nagpahipi sa mga dapit nga lisud diskobrehon.