Kinsay mabulahan ning pag-atras ni Duterte

Dako og epekto sa rating sa ubang mga presidentiable ang pagpahibalo ni Davao City Mayor Rodrigo Duterte nga mo-retiro na siya sa politika ug dili siya modayon pagdagan pagka-presidente sa 2016.

Upat lamang sila nga gitan-aw sa mga tawo nga magsakbang pagka-presidente sa 2016:  Bise Presidente Jejomar Binay, DILG Secretary Mar Roxas, Senador Grace Poe, ug si Duterte. Sa mga unang mga survey, si Binay gisundan dayon ni Poe ug Duterte, apan sa survey nga gi-komisyon sa Liberal Party, nag-una na si Roxas.

Karon nga mi-atras na si Duterte, asa man paingon iyang mga supporters? Dili pud tingale mapunta ni Binay kay klaro man ang konsentrasyon sa pabor niya ang masa sa Metro Manila lamang unya nag-anam kini og kanaog samtang nagsingabot ang adlaw pagsang-at sa sertipiko de kandidatura sunod bulan. Samtang ang Kabisay-an ug Mindanao gisaw-an nilang Roxas ug Duterte, samtang ang kang Grace gikan sa dumadapig ni kanhi president  Joseph Estrada.

Sa labing ulahing survey niadtong summer, ang katupad ni Duterte mao si Roxas nga pulos silang duha nakakuha og 15 porsiyento. Posible kaha nga mopaingon kang Roxas ang mga dumadapig ni Duterte? Posible. Ang mga isyu sa nasud (balikbayan boxes, Iglesia ni Cristo, Manila traffic, ug uban pa) maayong pagkadumala sa Malacañang nga posibleng makatabang sa ilang manok nga si Roxas.

Bantayan hinuon kining gianunsiyo ni Duterte kay basin og stratehiya lamang kini aron mosaka pa iyang rating. Si Grace sa iyang bahin nagkapuliki og panagang sa kasong iyang giatubang sa Senate Electoral Tribunal human gipetisyonan sa iyang pagka-American citizen, pun-an pa sa iyang sakay-sakay sa isyu sa Iglesia ni Cristo nga wala magkadimao diin gisaway siya pag-ayo sa mga netizens sa social media.

Dinhi sa Sugbo, tutokanan pa sa Liberal Party ang problema sa mga local nga kandidato. Ug maayong sugdan na og klaro ni Gob. Junjun Davide. Sa unang distrito, nakasabot ko nganong gi-itsa puwera silang Abe Canoy sa San Fernando ug Johnny delos Reyes sa Talisay.

Sa Mandaue, masabot nako nga gipahimug-atan sa local LP ang kampo ni Konsehal Lollipop Ouano-Dizon. Apan ang mga Ouano nagpaabot og klarong tubag gikan kang Davide kinsa gyud kanilang Kongresista Luigi Quisumbing ang sabakon. Apan tungod sa respeto ni Lollipop ug amahan niining si Bokal Teddy Ouano sa liderato ni Junjun sa LP sa Sugbo, giduaw kini og gipangayoan ug klarong baruganan, apan wala magpaklaro ang gobernador.

Kun dili siyay sabakon sa LP, si Lollipop morespeto sa desisyon, apan dili kini mosuporta ni Davide ug Bise Gobernador Agnes Magpale. Mao kini angay timbangon kinsa nilang Luigi ug Lollipop ang maka-deliver alang kang Roxas ug Davide.