EDITORYAL – Pahimuslan ta ang ‘suffrage’

Karong Oktubre 31, mapupos na ang pagpangrehistro sa Commission on Elections (Comelec) sa mga gusto nga mahimong botante sa eleksyon karong sunod tuig.

Nabantayan nga pipila lang ka tawo ang mobisita sa mga opisina sa Comelec aron magparehistro, apil kadtong mobalhin sa pagparehistro sa laing mga dapit o barangay.

Sagad g’yud sa mga Filipino nga kun dili moabot ang hinapos nga mga adlaw sa pagpangrehistro, dili usab sila magganayan pag-adto sa Comelec.

Angay kaha kita nga maluoy sa mga tawo nga sigurado nga masakripisyo sa ilang pagparehistro nga adto na himoa pipila ka adlaw sa dili pa motak-op ang registration?

Gawas lang kun mohukom ang kadagkoan sa Comelec-Manila nga iuswag ang pagpangrehistro, ang pagpangrehistro kutob na lang g’yud sa Oktubre 31.

Ang Comelec mihimo pa gani og paagi nga mobukas sila sa adlaw’ng Sabado aron paghatag og higayon niadtong mga nagtrabaho, apan wala gihapo’y mga mipahimulos sa higayon.

Ang mga botante kinahanglan gayud nga mogawas gikan sa ilang panimalay ug mosalmot sa eleksyon karong sunod tuig kay mao kini ang higayon nga mopili kita og presidente sa nasud.

Kun dili kamo mosalmot sa eleksyon ug dili niya pahimuslan ang inyong “suffrage” basin og moabot ang higayon nga magmahay kamo kun makapili kita og dili maayo nga presidente.

Kinahanglan nga timbang-timbangon nato pag-ayo kun si kinsa ang atong tugyanan sa renda sa pagdumala sa atong nasud.

Apan mag-unsa man kun dako kamo og tinguha nga makabotar apan wala mahimoi og “biometrics” ang inyong rekord sa Comelec?