Kakuyaw gud niini!

Nanglimbawot ang akong balhibo pagkasayod nga usa ka dalagita didto sa Dagupan City namatay human gigamitan og oxygen kay naapil niya’g hanggap ang mga taya gikan sa tangke nga gisudlan sa oxygen.

Ang dalagita nakasinati lang unta og Moderate Asthma (hubak) ug sagad nga buhaton sa mga doktor nga “paasohan” siya, i-nebulize. Apan diha nga gidala ang dalagita sa usa ka ospital, mihukom ang doktor nga gamitan siya’g oxygen.

Dayon, gikuhaan og X-Ray ang dalagita. Clear ang iyang dughan. Taud-taud, human ang dalagita gigamitan og oxygen aron unta makatabang kaniya sa pagginhawa, misamot hinuon ang iyang ubo.

Dili na gayud mohunong ang ubo mao nga gidala ang dalagita sa Intensive Care Unit (ICU). Milanat ang dalagita og lima ka adlaw sa ICU. Gikuhaan na usab og chest X-Ray.

Ang resulta, dili na Clear ang X-Ray result! Wala madugay, namatay ang dalagita. Gipa-autopsy sa iyang mga ginikanan ang patay’ng lawas.

Didto nasuta nila nga ang baga (lungs) sa dalagita puwerte’ng daghana nga mga pino kaayo nga taya. Nagtuo sila nga ang taya gikan sa oxygen nga gigamit aron unta makaginhawa ang bata.

Aron pagsiguro, gisusi g’yud, gibuak ang cylinder tank sa oxygen, ug napasiga ang mga mata sa nakakita nga puwerte’ng tayaa diay sa ilawom sa tangke.

Nakapangutana ko sa akong kaugalingon, dili kaha kining mao nga sitwasyon nahitabo usab dinhi sa ato sa Sugbo? Kakuyaw ba diay niini kun gamitan kita og oxygen nga isulod og puthaw nga cylinder tank?

Sa akong pag-research, nahibaw-an nga bisan dinhi sa Sugbo daghan diay nga mga cylinder tanks nga gigamit ug gisudlan og medical gases sama sa oxygen, gitaya na ‘sab ang ilawom.

Angay tingali nga ang kadagkoan sa Food and Drugs Administration (FDA) molihok na aron masiguro ang kaluwasan sa atong mga pasyente.

Tiaw mo, modangop man gani kita sa ospital aron maayo sa atong mga sakit apan kun gamitan ta og oxygen, posible diay kita nga matiklo kay maapil og hanggap ang mga taya?

Maayo unta og atimanon kini dayon sa kadagkoan sa FDA. Aduna man diay sila’y Circular 2015-007 nga giisyu kaniadto’ng Abril 10, 2015 kabahin niini.

Ang mga ospital ingon man ang mga tigbaligya niining oxygen kinahanglan nga mogamit og tangke nga dili motaya, sama sa stainless steels.

Tan-awa ra gud na ang mga cylinder tanks nga gigamit ug gisudlan sa mga oxygen, daghang taya. Inigdakdak niana gikan sa gikargahan nga trak, sa ilawom mapulpog ang mga pino nga taya!