Ang mga segurista'ng trapo!

Sa gipahigayon nga protest rally sa mga sakop sa Iglesia ni Cristo (INC), nahukasan sa maskara ang mga politiko nga misakay sa kahigayonan sa pamasin nga makabingwit sa suporta sa INC sa umaabot nga eleksyon.

Si Besi Presidente Jejomar Binay nga klaro pa sa siga sa adlaw ang iyang pagpamolitika sa isyu kay bisan og nasayod na siyang daan isip abogado sa teknikalidad sa kaso, apan nagpakaaron-ingnon nga ignorante sa balaod basta makahatag lang og simpatiya sa maimpluwensyang grupo.

Mas nakugang ang mga tawo, lakip na ang mga supporters unta ni Senador Grace Poe nga nadismaya sa iyang giluwatan nga komentaryo pagdapig sa INC.

Bisan pa man og todo depensa karon ang kampo sa senador isip damage control, apan ulahi na kay nabisto na man ang iyang baraha nga walay kalainan sa iyang posible nga ikakontra kun mopadayon siya pagpapili pagka presidente sa 2016 election.

Si Mar Roxas nagpakahilom lang diha nga init pa kaayo ang protest rally apan lawom usab kaayo og dulot kinsa tataw kaayo nga mibahag ang ikog.

Isip DILG Secretary, gihatagan niya og "sky is the limit" maximum tolerance ang rally nga milanat og pipila ka adlaw ug nakaperwesyo sa ubang mga tawo.

Kun dili pa lang mga INC ang nag-rally sa ingon adto nga sitwasyon, layo ra ang alas kwatro, gibungkag na ang mga nagprotesta.

Ang tulo ka politiko susama sa mga gutom nga iro nga nag-ilog sa usa ka bukog nga mao ang suporta sa Iglesia ni Cristo.