Ang dilemma ni Delima!

"That's What Friends Are For."

Gikanta kini ni Justice Secretary Leila Delima diha nga nag-ala Dionne Warwick siya sa Cebu Coliseum atol sa panagtigom nga gitawag og "Gathering of Friends" sa Liberal Party.

Ang tigum sa miagi’ng semana gitambongan mismo ni Presidente Aquino ug sa pambato sa Partido Liberal nga si DILG Secretary Mar Roxas.

Apan sa kapungot nga gipakita karon sa mga sakop sa Iglesia ni Cristo batok ni Secretary Delima, segurado nga mapagan g’yud ang Liberal Party.

Bisan og wala pay official pronouncement, apan tataw na kaayo nga magpapili si Delima pagka senador sa 2016 Elections.

Dili mahimo nga ibalewala ang puwersa sa Iglesia Ni Cristo tungod sa impluwensya niini nga mahimo’ng makapadaog o makapapilde og kandidato.

Dako kaayo kini nga bagyo nga sagubangon sa politikanhon nga ambisyon ni Delima ug sa iyang mga kauban sa Partido Liberal.

Dinhi masukod kun pabilin ba nga sapnayon si Delima sa iyang mga “kaputol og tinai” sa barko nga gisakyan o itambog na lang siya sa dagat aron dili sila hingpit malunod ug maluwas pa ang iyang mga kauban ilabi na ang kapitan sa LP nga si Mar Roxas.

Ang lyrics sa kanta, nagkanayon "For good times and bad times I'll be on your side forever more." Aw maayo unta kun ingon niini ang mahitabo kang Secretary Delima nga dili siya biyaan sa iyang mga kauban sa pagpanimpalad niya sa 2016 Elections.