Ambisyon o balaod?

Kun dili mohimo sa ilang trabaho ang mga ahensiya sa gobiyerno sawayon, apan kun mohimo ‘sab sila sa ilang trabaho sawayon lang gihapon ug pasanginlan og dili maayong pakapin sa estorya.

Sanglitanan niini ang bag-ohay nahitabo sa buhatan sa Department of Justice dihang gibabagan sa mga sakop sa Iglesia ni Cristo ang ganghaan niini mao nga didto sa luyo sa Palace of Justice nilusot si Sec. Leila De Lima aron makagawas sa maong buhatan.

Ang gibuhat sa INC dili lang maisip nga pag-atake lamang ngadto kang De Lima kondili pag-atake sa tibuok ahensiya sa DOJ ug sa gobiyerno ug katawhan nga giprotektahan niini.

Pila ba kaha ka mga biktima nianang adlawa nga nangita og katarongan ang nahikawan nianang adlawa tungod kay wa maatiman  gumikan sa kaguliyang diha sa gawas sa DOJ?

Gipasanginlan sa INC si De Lima nga mihatag og espesyal nga pagtagad sa reklamo ug sa gipasakang kasong harassment, illegal detention, threats and coercion batok sa INC officials sa gitaktak nilang miyembro ug sa pamilya niini nga si Isaias Samson Jr.

Unsa man diay ang angay buhaton sa DOJ? Dili lang tagdon ang reklamo kay pwerteng lig-ona nga grupo ang gireklamo?  Kun dili kini atimanon sa DOJ sawayon sab sila sa publiko ilabi na sa mga nireklamo. Mao kini ang sitwasyon sa mga anaa sa gobiyerno, apan dili kini rason aron di nila buhaton ang ilang mga trabaho tungod kay bisan ang mga nanaway mao man ang nagsweldo kanila.

Duna nay nanggawas nga mga report nga apil sa senatorial lineup sa Liberal Party si De Lima, maayong bantayan kining kasoha kun di ba malawgaw sa politika. Anhi ‘sab masuwayan kun bawugon ba ang atong balaod alang sa ambisyon sa politika.

Nabutang karon sa di komportableng sitwasyon si De Lima ug ingon man ang administrasyon. Hapit na ang eleksyon, bisan kinsang kandidato magpahumot g’yud sa INC sa pamasin nga makakuha sila og suporta.