Diha sa kamingaw sa kagabhion

Ganahan unta ko nga mobasa og mga libro usa ka gabii niana sa dihang akong nakita nga daw lisud man diay kini kun ikaw dunay gipamati sa lawas. Sa laktod, ako gihilantan. Bugtong ang akong ubo ug hingos ang madungog sa katag kong lawak. Mga alas tres sa kaadlawon ako nakamata. Ug daw sa bug-at ang lawas ibangon mao nga sa kisame akong gipunting ang akong panan-aw. Mao kini ang perk sa pag-inusara. Inom ka og tambal nga ikaw ra. Mamalandong sa kinabuhi nga ikaw ra ug mangutana kun unsa ang kinabuhi nga ikaw ra. Apan sa laing bahin ang kinabuhi sa pag-inusara kahigayonan usab sa pagpamalandong sa imong kalambigitan uban sa Dios. Ang tanan biyaan maingon nga ang tanan mobiya kanimo. Akong nakita nga human sa kagahob tingali gumikan sa imong nag-alintabong pagpaningkamot imong makita ang imong kaugalingon nga mag-inusara diha sa pag-amgo nga ikaw nahigmata nga nag-inusara ug mamatay nga mag-inusara sa kalibutang individualistic kansang katilingbanong panaw mahimong kabahin lamang sa fiction sa kinabuhi.