Hasola uy!

Mao kini ang pulong nga sagad gilitok sa mga ordinaryo nga tawo nga nahasol kaayo sa kalit nga pag-usab sa rota sa mga sakyanang pasaheroan nga wala na paagia sa mga karsada sa dakbayan sa Sugbo nga agianan sa mga delegado sa APEC meeting.

Atol sa gipahigayon nga “dry run,” tugotan nga makaagi ang mga PUJ sa APEC route sa higayon nga makalabay na ang convoy sa mga delegado.

Apan kalit kini nga giusab sa Cebu City Transportation Office kay gidid-an na ang mga PUJ nga moagi sa Pope John Paul II Avenue gikan sa alas 8 sa buntag hangtud na sa alas 9 sa gabii.

Rason ni Atty. Rey Gealon, executive officer sa CCTO, nga ang ilang gihimo nga pag-usab sa rota gitumong aron maseguro ang kaluwasan sa mga international visitors sanglit wala’y oras nga gihatag kanila sa APEC Organizing Committee.

Duna may punto ang CCTO sa ilang gihimo nga lakang apan dili usab makiangayon sa mga yano nga Sugboanon nga mahikawan sa ilang katungod pagsakay sa public transportation kay gipalabi ang mga bisita.

Dili lalim nga maglakaw gikan sa Mabolo hangtud sa Lahug nga maoy gihimo sa mga tawo, ilabi na kadtong wala’y ika-afford pagplete og taxi. Mas maayo seguro nga tugotan nga makaagi ang mga PUJ sa APEC route sa higayon nga wala pay mga moagi nga delegado.

Masayran naman seguro sa mga enforcers sa airport pa lang nga may mga APEC delegates na nga nangabot ug mopadulong na sa ilang destinasyon. Magtawganay ang mga traffic managers sa tulo ka dakbayan aron mabana-bana kanus-a sirad-an sa mga PUJ ang rota sa APEC.

Laing solusyon mao ang pagpadagan sa siyudad og mga bus nga maoy mopasakay sa mga pasahero nga apektado. Gusto nato nga ma-impress ang atong mga langyaw nga bisita apan mayatakan ‘sab ang katungod sa kaugalingon nato nga kadugo. Asa na ang hustisya?