EDITORYAL – Mapahimuslanon nga taxi driver

Daghan sa mga drayber og taksi karong panahona ang wala na motuman sa lagda nga gilatid sa Land Transportation Franchising and Regulatory Board (LTFRB) nga ibanan nila’g P10 ang kolektahon nila nga plete gikan sa ilang pasahero base sa kantidad nga matala sa ilang metrohan.

Sa laktud, kining mao nga mga drayber sa taksi nagpahimulos sa kamalimtanon sa ubang pasahero ug sa kamaulawon sa mga pasahero nga dili na lang moreklamo nga gitikasan sila og P10. Diha nga gipahinumdoman sa usa ka sakop sa media ang drayber sa taksi kabahin sa lagda nga angay’ng ibanan og P10 ang kantidad nga iyang kolektahon, diha pa nga ang drayber sa taksi mitunol, apan wala gani mangayo’g pasaylo sa iyang pagsuway og abuso. Tinuod, hasol kaayo alang sa mga pasahero nga moreklamo pa g’yud ngadto sa LTFRB kun makasugat sila og drayber nga susama og batasan nga tikasan.

Ang mga drayber sa taksi musamot kadako ang ilang ganansya tungod kay kun makapasakay sila og 50 ka pasahero sa tibuok adlaw nila nga pagpamasahero, nagpasabot nga P500 ang ilang maganansya gikan sa kuwarta nga dili na unta ila.

Angay g’yud nga estriktohon ang lagda nga silotan g’yud ang mga drayber sa taxi nga dili boluntaryo nga mohatag og P10 nga diskuwento sa pletehan sa ilang pasahero base sa gilatid sa LTFRB.

Daghang pasahero ang nalimot na nga ang kagamhanan mihatag diay og lagda nga ang pletehan sa taksi kinahanglan nga ibanan og P10 sa kada sakay sa pasahero.

Dili usab makiangayon sa mga pasahero nga samtang mahal na ang bayad sa taksi pagka karon, apan daghang taksi ang mga laksot na kaayo sakyan.