Dakong hagit

Sa makausa pa akong itunol ang akong mainiton nga pahalipay ngadto sa Banat News tungod sa kasumaran sa pagkahimugso niini. Insakto karong adlawa 21 na ka tuig ang nakalabay miguwa ang unang isyu niining inyong paborito nga pamantalaan.

Gikan sa usa ka ordinaryo nga diyaryo nga nagsugod pagsirkular sa kadalanan sa Metro Cebu kaniadtong 1990s, nitubo ang Banat News ngadto sa usa ka nag-unang Binisaya nga pamantalaan sa nasud.

Sulod sa duha ka dekada, walay hunong ang pagserbisyo sa Banat News paghatod og inpormasyon dili lamang ngadto sa mga Sugboanon kondili ngadto usab sa katawhan sa mga silingang probinsiya sa Bohol, Negros ug Leyte.    

Alang kanamo nga nagpahipi sa likod niining maong pamantalaan, dili matukib among pasalamat sa dakong suporta gikan sa among mga bumabasa. Ang inyong pagsalig maoy nag-aghat kanamo pagpakusog pa sa among pagserbisyo alang sa inyong katagbawan.

Hinuon makalaum kadtong liboan namong bumabasa nga ang Banat News mopadayon gayud sa iyang papel isip dakong testigo sa mga panghibato matag adlaw sa Sugbo, Kabisayaan ug sa tibuok nasud.

Niining selebrasyon sa pagkahimugso niining inyong paborito nga pamantalaan, lab-as pa nakong nahinumdoman ang akong role isip contributing editor sa Banat News sulod sa pipila ka tuig gikan niadtong 1998.

Gawas sa maong role, mogawas usab matag Domingo kining maong kolum. Ang Saksak Sinagol nagsugod niadtong 1998 sa Sports Section niining maong pamantalaan. Apan sulod sa pipila lamang kadto nga isyu.

Pinaagi sa advice ni Sir Juanito Jabat, ang among editor-in-chief kaniadto, mibalhin ngadto sa Opinion Section kining maong kolum. Hangtud karon, sulod sa 17 na ka tuig, pabiling naglawig kini dinhi sa maong seksiyon.

Sulod na sa pipila ka tuig nga kaduha sa usa ka semana na kini mogawas: matag Biyernes ug Domingo. Ug makalaum kamo nga sa umaabot pang katuigan, padayon gihapon ang atong pagtuki sa mga init nga isyu nga may kalabotan ang lungsod.  

 Ang kasaulogan karong adlawa nagdala og dako nga hagit pagsagubang sa dako nga misyon nga nagpaabot sa unahan. Kining maong misyon mao ang pagpakusog pa sa among pagserbisyo ngadto sa mga suki’ng bumabasa.