Tan-awa, nasayop ba ko?

Tan-awa, nasayop ba gud ko? Husto ang akong panglantaw nga si Cebu City Councilor Mary Ann Delos Santos moipon sa Bando Osmeña Pundok-Kauswagan (BOPK) human siya mibuwag na sa grupo ni Mayor Michael Rama.

Gipahibalo na g’yud ni Mary Ann kagahapon nga alyado na siya sa BOPK nga gipangulohan ni kanhi Kongresista Tomas Osmeña.

Klaro man gud kaayo kay duha ra ka politikanhong pundok ang lig-on dinhi sa dakbayan sa Sugbo, ang Team Rama ra ug ang BOPK.

Kun si Mary Ann  mag-independente, puwerte’ng hasola kay bisan og milyonarya siya, dili sayon ang trabaho nga magbinugtong ka.

Panahon sa kampanya, mao nga walay ganahan maminaw sa imong pulong-pulong kay ikaw ra man usa, lagmit pa gani dili na lang magpulong-pulong ang independente. Sa ato pa, layo ang kadaugan.

Daku kaayo’g ngisi si Konsehal Margot Osmeña mipahibalo kanako nga dili na sila kaaway sa taga Lahug tungod ni Mary Ann  nga mipasabot sa sitwasyon kaniadto diha nga mayor pa si Tomas Osmeña.

Nakasabot ko nga naproblema g’yud karon si Mayor Rama tungod niini nga kalamboan sa politika sa dakbayan kay mangita na usab siya og iyang lider sa Lahug.

Ug nakaila na kita nga si Mary Ann  mao g’yud ang giila nga lider sa taga Lahug. Sa ato pa, lisud ang sitwasyon sa mga kandidato sa Team Rama diha sa mao nga barangay.

* * *

Hapit na g’yud ang pagpasaka sa mga certificates of candidacy niadtong molansar sa eleksyon sunod tuig, apan wala pa kita masayod kinsa ang mga bise presidente.

Sa pagka presidente, nasayod na man kita nga si Vice President Binay sa UNA ug Roxas sa Liberal maoy magsangka.

May nangandoy nga kun dili si Senador Grace Poe, si Kongresista Leny Robredo unta ang magbise ni Mar. Gitan-aw man gud nila nga ligdong sila ug haum nga ipares kang Mar.

Apan kun tan-awon baya ninyo og maayo no, mas nindot si Robredo kay abogada ug kongresista ‘sab.

Si Grace Poe sikat lang ilabi na niadtong nakakita sa TV sa paghusay sa Mamasapano massacre. Para kanako, kun padayon nga magpadiki-diki si Grace Poe, pasagdahan na lang siya ug mangita na lang si Roxas og laing ka tandem.

Nakadungog man gud ko nga si Grace Poe gusto g’yud nga magpresidente ug ang iyang bise mao si Senador Chiz Escudero. Naunsa, mas makamao pa man gani niya si Chiz.

Kinsa kaha tawon ang mosalig kang Grace Poe nga maoy atong padumalahon sa nasud nga wala pa man siya’y kasinatian.Ikaduha, giitsa-puwera na niya ang Pilipinas diha nga nagpahimo siya nga American Citizen.