Impason na ang utang

Gisumiter na sa opisina ni Mayor Michael Rama ngadto sa konseho sa dakbayan sa Sugbo ang supplemental budget alang ning tuiga ug apil niini ang para bayad sa nahabilin nato nga utang sa Japan sa pagmugna sa South Road Properties.

Unta ang mga konsehal mopadaplin sa ilang party affiliation ug mo-cross party line aron sa ingon ilang aprobahan ang supplemental budget nga giduso sa mayor ug aron maimpas na ang utang sa dakbayan sa Sugbo.

Ang utang sa pagmugna sa SRP unya pa sa tuig 2025 maimpas diin ang dakbayan sa Sugbo magbayad og tag P500 milyones matag tuig.

Karon nga may salapi na ang dakbayan, mas maayo nga impason na lang ang utang niini gikan sa Japan Bank for International Cooperation (JBIC) aron ang tunga sa bilyon ka pesos nga bayronon matag tuig magamit kini sa laing mga programa ug proyekto nga makaayo sa katawhan.

Ang pag-impas sa utang makahatag og maayo nga imahen sa dakbayan ngadto sa mga foreign financial institutions kay makaingon man sila nga ang dakbayan sa Sugbo dili lang kay maayo mobayad, sayo pa g’yud nga moimpas.

Busa awhag nako sa mga konsehal nga sakop sa oposisyon nga motugot sa giduso nga supplemental budget kay basin og masuko unya kanila ang mga tawo.

Lisud na kay hapit na ra ba ang eleksyon ug dili kita gusto nga mapagan sila.