Qualification ni Poe

Tan-aw nako, mao ra og nasulod sa ulo ni Senador Grace Poe ang iyang popularity pinasikad sa resulta sa mga survey, media blitz, pag-ulo-ulo ni Senador Chiz Escudero ug pagdasig sa iyang mga dumadapig.

Gumikan niini, nasulod sa ulo ni Poe nga siya ang labing qualified nga mopuli ni Presidente Noynoy Aquino, hinungdan nga sa pagkakaron, mora’g di siya mo-settle down pagka-bise presidente, kondili, pagka-presidente g’yud.

Gamay ra alang kaniya ang pagka-vice president.

Alang kang Poe, siya ra ang makasulbad sa mga problema nga giatubang sa atong nasud, sama sa gi-claim sa China nga 3.5 million square kilometers sa West Philippine Sea.

Ning maong isyu, mipatunga na ang America, ug mipadayag sa ilang kabalaka ang ubang kanasuran, labi na dinhi sa Asia, sa katandugon ning maong kahimtang.

Ang China wala maminaw sa America ug sa United Nations. Maminaw kaha sila kanato inigka-presidente na ni Poe?

Laing problema: Unemployment ug poverty alleviation. Mga suliran kini nga wala matagad sa nangagi nga mga presidente. Karon, ang gipasibantog nila nga economic growth, wala ma-translated into job creation, wala mo-trickle down nganhi kanato. Sila ra didto sa itaas ang nabulahan niini.

Maoy gikinahanglan ang dugang direct foreign investments (FDI). Apan, gumikan sa kaestrikto sa atong mga balaud bahin niining pagpasulod sa maong mga langyaw’ng capital, biya kaayo kita sa ubang kanasuran kun FDI na ang hisgutan.

To attract foreign investments, kinahanglan nga atong himoan og kausaban ang mga economic provisions sa atong Constitution. Sa ato pa, mag Cha-Cha (Charter Change) ta. Mosugot kaha si Poe niini?

Unsa man ‘sab unya ang mga economic policies ni Poe? Pananglitan, pag-set sa mga priorities, unsa may iyang unahon, ang industrialization o ang pagpalambo sa agrikultura? Agriculture vs. Industry. Ang mga statistics nagpakita nga mas nagmalamboon ang mga highly industrialized nga mga nasud, kay sa uban nga mi-prioritize sa agriculture ug sa services. Unsa may stand ni Poe niini?

Nagpaluyo niining tanan mao ang infrastructure. Maunsa man ang atong mga concerns ug mga priorities, kinahanglan nga mapahimutang ug mapalambo ang infrastructure. Mahimo kaha ni ni Poe?

Dugang niini, kinahanglan masumpo na, for good, ang corruption, ug mapadayon sa tumang kamatinud-anon ang Daang Matuwid nga gilatid ni Noynoy.

Nagbaton ba sa igong katakos si Poe pagsagubang niining tanan, tungod lagi kay nag-una siya sa mga survey?

Kun mao kini ang imong criterion o basis for judgment pagpili sa presidente, then, go ahead. Imo kining katungod.