EDITORYAL – Nagpaigot si Mary Ann

Sa duwa sa baraha, adunay gitawag og “paigot.” Anam-anamon sa usa ka player ang pagtan-aw sa dibuho nga anaa sa iyang baraha aron pagsuta kun makapadaog ba kini kaniya.

Kini karon ang gihimo ni Konsehal Mary Ann Delos Santos nga mipaigot pag-ayo sa iyang baraha ug wala dayon pahibaw-a ang katawhan kun makig-alyado na ba siya sa Bando Osmeña Pundok-Kauswagan.

Masabot kaayo nga gitun-an pa pag-ayo ni Konsehal Delos Santos kun unsa ang epekto sa iyang pagahimuon.

Kun iyang biyaan sa hingpit ang Team Rama nga maoy gisandigan niya paglansar sa pagka konsehal, kadtong mga dumadapig sa ilang pundok dili na tingali mobotar pa kaniya.

Apil nga gitan-aw ni Konsehal Delos Santos mao nga kun mag-independente siya sa pagpapili pag-usab isip konsehal sa dakbayan, hasol kaayo alang kaniya nga walay kaabag, ilabi na panahon sa kampanya.

Kini gani ang rason ngano nga tagsa ra kaayo ang mga independente nga kandidato nga makadaog kay dili man nila maato pagsuroy ang mga barangay nga sila ra ang maghimo og pulong-pulong.

Ikaduha, walay tawo nga ganahan maminaw kun siya ra usa ang mosaka sa stage ug modiskurso. Klaro kaayo nga gihuwat ra ni Delos Santos ang tayming.

Posible nga ang pagpahibalo niya nga moipon na siya sa BOPK himuon na niya karong Biyernes. Bisan sa pagtubag sa pangutana sa media nagpadiki-diki si Delos Santos ug nagpaigot gihapon sa iyang baraha.

Bisan og nabisto na ang iyang gitipigan nga baraha, ilabi na sa pag-resign niya kagahapon isip minority floor leader sa Cebu City Council, padayon pa nga nagpaigot si Delos Santos.