EDITORYAL – Habal-habal nangatawa ra

Gikataw-an lang sa mga drayber og habal-habal ang bag-ong balaod nga gipirmahan ni Presidente Aquino – ang Republic Act 10666. Mao kini ang balaod nga nag-regulate sa pagpasakay og mga bata sa motorsiklo.

Ang mga drayber og motorsiklo nga gigamit og habal-habal, ilabi na ang mga nag-operate diha sa JY Square sa Barangay Lahug, wala g’yud magtuo nga mapatuman sa mga road law enforcers ang bag-ong balaod. Dugay na man gud nga adunay balaod nga dakpon ang mga drayber sa motorsiklo kun sila ug ang ilang angkas dili magsul-ob og crash helmets apan tungod sa kapulpol sa mga enforcers wala kini mapatuman.

Dili man gani dakpon sa mga traffic enforcers ang mga magsakay og motorsiklo nga wala magsul-ob og helmet, unsa pa kaha kun ang pasahero o bata ang wala mag-helmet?

Ang ubang traffic enforcer nga sakop sa Cebu City Transportation Office (ang kanhi CITOM) misuway og pangatarungan aron sa pagtabon sa ilang palpak sa pagdumili pagpatuman sa balaod.

Dili kuno sila makadakop sa mga malapason sa special laws kay wala sila isyuhi og Temporary Operators Permit (TOP) kay wala pa sila gi-deputize sa Land Transportation Office.

Klaro kaayo nga wala sila masayod nga ang dakbayan sa Sugbo adunay balaod nga mosilot sa mga drayber sa motor nga dili mag-helmet ug apil na gani ang mag-drive og bisekleta nga adunay kambiyada.

Tukma lang g’yud nga idili ang pagpasakay og gagmay’ng bata sa mga motorsiklo. Kadtong mga dagko na, mahimo nga pasakyon apan pasul-ubon g’yud og helmet.