Gusbat ug wala na kapahimusli

Mitugot na ang buhatan sa Ombudsman sa lakang alang sa rehabilitasyon sa Cebu International Convention Center. Aduna man guy plano ang kagamhanan sa probinsiya sa Sugbo nga i-repair kini aron nga kapahimuslan.

Sa pagkakaron, gusbat na ang maong building. Wala na kini gigamit tungod sa dakong kadaut nga naangkon niini gikan sa dakong linog nga mitay-og sa Bohol ug Sugbo ug sa super typhoon nga si Yolanda kaniadtong 2013.  

Sulod sa duha ka tuig, nagyaka nga puno sa guba ang CICC. Wala na ang kanhi kaanyag ug kagarboso niini isip nag-una nga binyu sa mga internasyonal nga konbensiyon sa Kabisayaan ug Mindanao.

Gituyo pagtukod ang CICC sa administrasyon ni kanhi gobernadora Gwendolyn Garcia, karon kongresista sa ikatulo nga distrito sa Sugbo, aron maoy binyu sa Association of Southeast Asian Nations Summit kaniadtong 2007.

Human niadto, mas naila ang Sugbo isip sentro sa mga dagkong katiguman gawas sa Metro Manila. Gani diha mismo sa CICC ako nakakita sa kumbati ni Manny Pacquiao batok ni Shane Mosley pipila na ka tuig ang nakalabay.

Apan kalit lamang nga mitiurok ang CICC human sa duha ka kalamidad kaniadtong 2013. Wala na kini makabangon sukad sa iyang pagkagusbat. Tungod kay wala na usab tagda sa kasamtangang namunoan sa lalawigan, nahisama na kini karon sa usa ka white elephant.

Daghan ang gisayangan sa dakong salapi nga gigamit alang sa pagtukod sa CICC apan wala na kini padayong napahimusli. Hain na ang pangagpas kaniadto nga ang CICC mohakot og dugang salapi alang sa panudlanan sa Kapitolyo?

Nagdumili kuno paghilabot sa CICC ang kagamhanan sa probinsiya karon gumikan kay ebidensiya pa ang maong edepisyo sa kaso nga giatubang ni Garcia nga may kalabotan sa giingong anomaliya sa katukoran niini.

Apan alang sa mga Sugboanon kinsa masub-anon nga nagsud-ong karon niini, ang kahimtang sa CICC maoy dakong testigo sa naandan nga sakit sa kagamhanan pagpabaya sa mga kabtangan sa lungsod.    

Karon nga mitugot na ang buhatan sa Ombudsman, angay lamang nga dalion sa Kapitolyo ang rehabilitasyon sa CICC. Dakong sagpa sa imahe sa mga Sugbuanon kun padayon kini nga magyaka ug dili na mapahimuslan.