Gusto’ng kuhaon ang iyang bahin sa kabilin

Dear Atty. Divine,

Duna ko’y pangutana labot sa among kabilin nga yuta. Lima mi ka magsuon ug nakapangan na namo’ng lima ang property as co-owners apan wa pa ma-subdivide. Gusto unta nako nga ibaligya ang akong share apan dili man mosugot ang uban nako nga igsuon. Unsa may angayan nako nga buhaton aron akong makuha ang akong share ug akong mabaligya? Duna pa ba ko’y laing mahimo kun di g’yud nako sila makombinser sa paghatag sa akong share? Daghang salamat. — Jimmy

Dear Jimmy,

Ang una nimo nga buhaton mao ang pagtanyag sa imong share ngadto sa uban nimong igsuon kay basin interesado sila nga maoy mopalit. Mas maayo ‘sab nga imo sila nga pasabton kun ngano nga ibaligya nimo kanila ang imong bahin sa yuta tungod kay kabilin gud kini sa inyong ginikanan busa dili sila gusto nga mahatag og lain. Kun pananglitan dili g’yud nimo sila makombinser, then ang last nimo nga option mao ang pagdangop na sa korte alang sa Judicial partition, imong pangayuon sa korte nga ipa-subdivide ang inyong property aron makuha nimo ang imong share ug mabaligya. Unta akong natubag ang imong pangutana. Thanks and God bless. – Atty Divine

 Alang sa inyong pangutana may kalabutan sa problema’ng legal, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column mata’g Miyerkules ug Domingo.