Mar for Samsam?

Nakadungog ko somewhere nga si Mar Roxas mo-endorse kuno ni Rep. Samsam Gullas pagpasubli pagka-kongresista sa una’ng distrito sa Sugbo. Tinuod ni? Wa pa ko kadungog og confirmation.

Kun tinuod man, unsa may mahitabo ni Mayor Abe Canoy sa San Fernando nga naglaraw man usab pagpakig-atbang ni Samsam? Si Abe usa ka daku’ng Liberal, samtang si Samsam daku usab nga Alayon.

Kahinumdoman nga si kanhi Rep. Eddie Gullas, ang hari sa Alayon, wala mosuportar ni Gobernador Junjun Davide sa miagi nga eleksiyon. Gani, kun buot hunahunaon, ang Alayon ni Gullas usa sa nakapapilde ni Mar Roxas sa miaging eleksiyon batok ni Vice President Binay.

Karon, adto si Roxas magpaluyo sa kaatbang nga partido ug iyang talikdan ang ka-partido niya sa first district. Mao ba, Mar?  Kun mao ni ang iyang buhaton sa ubang mga dapit sa nasud, mapilde na usab siya ni Binay.

Sugot lang pud si Gobernador Davide niini, isip chairman sa Liberal Party sa lalawigan? Mar, pag-sure uy!

* * *

Daghan na kaayong kahiwian ang gipasangil batok ni Vice President Jejomar Binay. Ang tubag ni Binay: politically motivated, ug wala’y katuohan nga mga ebidensiya nga nakita.

Laing tubag: Sukad sa iyang pag-resign isip sakop sa cabinet sa Presidente, wala ug tuo ang iyang pangatake batok sa administrasyon ni Aquino. Wala siya’y nakita nga maayo, bisan sa cabinet member pa siya, sa Aquino administration.

Bisa’g wala kinahanglana, mihimo siya’g kaugalingon nga SONA, iyang ginganlan og TRUE SONA, diin iyang gihikyad ang mga kalapasan ug kahiwian sa administrasyon ni Noynoy.

Mao kini, lungsod ang mga tubag ni Binay sa mga akusasyon batok kaniya. Satisfied ka  ba?

* * *

Daghan g’yud og kuwarta ang Pinoy kun maoy atong basehan ang kadaghan sa mga sakyanan nga mahalin matag adlaw. Sa miagi’ng pito ka bulan niining tuiga, miabot og 156,034 ka units ang nahalin. 

Timailhan ba kini sa paglambo sa atong ekonomiya, sama sa nahitabo karon nga construction boom sa tibuok nasud, lakip na dinhi sa Sugbo?

Sa sama nga panahon sa miagi’ng tuig, ang halin miabot og 129,687 lang ka units. Daku kaayo ang pagsulbong. Nakadugang sa kahuot sa trapiko.

Diin man ni sila’g daghang kuwarta? Ngano nga sila ra man, ug the rest nato, hilabihang purdoya, magmantiner man lang sa habal-habal as our mode of transportation?

Tinuod diay tingali ang giingon nga ang uban natawo nga mas swerte kay sa uban. Mas swerte sila kay kanato.