Away na g’yud!

Init na g’yud kaayo ang politika dinhi sa dakbayan tali kanila ni Mayor Michael Rama ug kanhi kongresista Tomas R. Osmeña. Masabtan nato nga gigukod g’yud sa kampo sa mayor ang tanang mga proyekto nga may kadugtongan sa iyang kontra.

Misinta sa kasuko si Tommy kaniadtong Lunes sa hapon kay gipahibalo siya nga gibutangan og mga No Parking signage ang atubangan nga bahin sa Farmer’s Market sa entrada nga bahin sa access road sa South Road Properties habig sa Mambaling.

Natural kun may karatola na nga No Parking, mahimo na nga dakpon ang mga motorista nga mo-park. Ang resulta, wala nay ganahan nga mamalit didto sa mao nga fruit and vegetable market nga gipasiugdahan ni Tommy.

Unya ang gimugna ‘sab nga CTU extention college didto sa Barangay Bonbon gibabagan usab ni Mayor Rama ubos sa rason nga wala pay igo nga pagpangandam alang sa mao nga tunghaan.

Ang Citilink Terminal nga gipanag-iya sa dumadapig ni Tommy gipasirad-an sab. Mao kini ang atong makita nga nagkainit na g’yud ang politika dinhi sa dakbayan tali kanila ni Tommy ug Mike.

Apan kun kauban pa sila sa grupo, sigurado ko nga dili moabot niining maong punto ang kontrobersiya.

* * *

Sila’ng duha si Tommy ug Mike ang magtigi kun kinsa ang makadumala sa dakbayan human sa eleksyon karong sunod tuig. Si Mike maoy kandidato ni Vice President Jejomar Binay, samtang si Tommy mao ang kandidato ni Mar Roxas.

Diha sa Mandaue City, mura’g wala pa makahukom ang kadagkoan sa Partido Liberal kun kinsa kanila ni Kongresista Luigi Quisumbing ug Konsehal Emmarie “Lolypop” Ouano-Dizon ang suportahan pagka mayor.

Apan tan-aw nako, daku kaayo ang posibilidad nga si Lolypop ang suportahan sa LP kay mas sikat siya kay ni Luigi. Ang akong inpormer mitug-an nga gikumbinser karon si Luigi nga magpabilin ra sa kongreso.

Kun si Luigi man gani ang suportahan sa LP, tan-aw nako mapilde ang ilang kandidato kay bisan sa survey sa radio sikat si Lolypop nga apo ni kanhi mayor Alfredo “Pedong” Ouano.

Maalkanse si Luigi ni Lolypop kay ang konsehal wala gayud malambigit og binuang. Ikatandi siya ni Mar Roxas nga wala malambigit og anomaliya.

Si Luigi naapil sa report sa Commission on Audit (COA) nga matud pa migamit sa P3 milyones sa iyang Priority Development Assistance Fund (PDAF) pinaagi sa mga bogus nga Non-Government Organizations nga iya ni Napoles.

Kining puntoha maoy angay nga hatagan og katin-awan ni Luigi aron dili madaot ang iyang politikanhon nga ambisyon.