EDITORYAL – Wala na’y checkpoint

Daghan na nga krimen nga misangpot sa pagkakalas sa kinabuhi sa katawhan ang nahitabo dinhi sa dakbayan sa Sugbo ug sa ubang mga dapit sa probinsya nga ang mga kriminal nagsakay og motorsiklo.

Nahitabo kini tungod kay panagsa na lang kaayo ang kapolisan nagpahigayon og checkpoint operation aron unta masumpo ang mga tawo nga nagdala-dala og armas nga walay pagtugot.

Sagad nga ang kapolisan mag-checkpoint lang kun adunay krimen nga nahitabo apan paglabay sa mga adlaw mohunong na usab. Kun kanunay lang unta ang kapolisan nga mag-checkpoint magpanagana g’yud kadtong mga badlongon sa pagdala-dala og armas.

Bisan gani ang mga sakop sa Special Weapon and Tactics (SWAT) team sa dakbayan sa Sugbo nga kaniadto walay hunong sa pagpatrolya nga magmotor sa lainlaing dapit sa dakbayan karon wala na kaayo makita sa publiko ning milabay’ng mga buwan.

Kini maoy usa sa rason nga walay kukahadlok ang mga kriminal sa paghimo og krimen sama sa pagpamusil bisan og adlaw’ng daku kay nasayod man sila nga lisud sila madakpan.

Kun ang kapolisan kanunay nga maghimo og checkpoint operation ug balhinbalhinon sa lainlaing lugar kada adlaw, sigurado nga magpanagana na g’yud ang mga kriminal sa pagdala’g armas kay daku man ang kahigayonan nga sila masikop.

Angay hinuon nga kun ang kapolisan magpahigayon og checkpoint operations kinahanglan nga bansayon g’yud nila ang ilang mga sakop, ilabi na ang mga crime watch volunteer, sa tukma nga mga lagda aron dili kini makahimo og kalapasan sa balaod.