Saksi ang CICC

Nahimo nga saksi ang Cebu International Convention Center (CICC) kun giunsa sa pagwaldas ug pag-usik-usik ang salapi sa katawhan sa lalawigan sa Sugbo. Ang CICC gitukod sa kantidad nga halos moabot og usa ka bilyon ka pesos gikan sa orihinal lang nga gahin nga P250 milyones. Tumong ug tuyo sa pagpatukod niini mao ang mga dagku nga kalihokan, ilabi na kadtong ASEAN Summit sa 2007 nga nauswag sa 2008.

Doble ang tumong niini tungod kay ang CICC wala lang magpaila sa Sugbo ngadto sa kalibutan, kun dili aron mahimo usab kini nga income generating facility sa probinsya.

Apan ang CICC wala makapaila sa Sugbo ngadto sa kalibutan nga usa ka maayong dapit nga abotanan ug angay’ng anha ipahigayon ang mga dagku nga events. Hinuon, nainila kini sa grabe nga kurapsyon sa pagpatukod niini hinungdan nga dali ra kini nga naguba ug wala makasustenir sa bagyo, linog ug ubang katalagman nga miagi bisan og bag-o pa kining natukod.

Ang CICC kauban ang kontrobersiya sa Balili property maoy hinungdan nga naparot si kanhi Kongresista Pablo John Garcia sa pagka gobernador sa Sugbo batok ni Junjun Davide III.

Imbes salbaron ni Gobernador Davide ang CICC gikan sa pagkalata ug pagkadugta, ang mao nga higante’ng edipisyo gipasagdan lang.

Hinuon napahimuslan kini sa taga DSWD kay ang mga hinabang nga ilang nadawat gikan sa lain-laing nasud sa kalibutan para sa mga biktima sa bagyo’ng Yolanda nga wala nila ipanghatag, gipakuyog man pud nila sa pagpalata ug pagpadugta sa CICC.

Ang pagtukod sa CICC gikaluhaan na og kurapsyon sa panahon ni kanhi gobernador Gwen Garcia apan giusikan usab ni Gobernador Davide ang salapi nga gipatukod sa CICC human niya kini pasagdi, gipalata ug gipadugta.

Sa laktod, ang duha kinahanglan nga manubag sa ilang mga palpak sa katawhan kansang salapi maisip nga giwaldas lang ug giusikan.