Nahimong usa

Kining magkaedad na ta, daghan na ang idili nato nga pagkaon. Bisan gani ang kaila nakong doktor ang niingon man, pangape kausa na lang sa usa ka adlaw kanang buntag ra. Apan kay lagi usahay coffee addict man masupak ang panugon sa doktor. Ug gawas sa kape, paminosan na pud ang karne. Lami unta ikaon og inasal apan aron layo ta sa peligro tuman na lang ta sa way daghang langas. Nahimong kabahin sa atong kinabuhi ingon nga mga Filipino ug Sugbuanon ang kaon. Magamay man o madako ang kasaulogan, anaa gyud ang kaon. Kini tungod kay dili man kita maghugop tungod lang sa pagkaon. Naghugop kita tungod kay mahinungdanon ang usa’g-usa. Ang pagkaon nahimo lamang instrumento aron magkahugop ang mga tawo diha sa ilang tinguha nga mamahimong usa pinaagi sa pagkaon, pag-inom ug labaw sa tanan kukabildo.

Ug kini ang buot ipasabot sa atong Ginoo diha sa iyang pag-ingon: Ang pagkaon nga akong ihatag mao ang akong unod alang sa kinabuhi sa kalibutan. Ug kun maghisgot kita og Kalibutan, dili kini ang Pisikal nga Kalibutan kondili ang kalibutan sa Kalambigitan. Ug unta diha sa atong pagkalawat niya, mamahimo unta kitang sama kaniya.