Nerbyoso nga kalmado

Swerte kaayo ang akong kompare kay panahon sa kasaulogan sa ilang piyesta sa lungsod sa Bogo,  ang ilang balay maalegre dili tungod kay dunay dagha'ng mamiyestahay kundi mangabot ang tanan niya'ng mga anak nga pulos na aduna'y mga pamilya. Naandan nga mag-'family reunion' sila atol sa piyesta.

Kini'ng kompare ug komare ko, kaniadto pa wala lang kaayo magdiparal sa ilang panglawas hangtud nahimong panulundon sa pamilya  kini'ng sakit nga nerbyos. Gikan sa kayutaan nila sa bukid, napugos sila paglalin sa patag nga sentro. Aron permi magpatsek-ap sa doktor sa kahimtang sa ilang panglawas.

Apan motuyo lang gyud nga moari sa Cebu City, kay ang iyang suki'ng doktor dia man magserbisyo sa ospital sa lalawigan. Human didto, una mopauli modalikyat gayud sa anak diin sakop ra namo'g pinuy-anan. Kausa nangutana ko'ng wala bay doktor sa ilaha, kay mobiyahe pa gud og 4ka oras gikan sa ila.

Niya pa, mahadlok siya sa lai'ng doktor magpatsek-ap kay murag mosamot ang iyang nerbiyos. Gani matud niya, kun magpa-blood presyur siya sa lain, mosaka'g maayo ang dugo.

Busa ang bata niya kun mobiyahe, mokuyog gyud ni, aron di sila kulbaan, kay tig-BP nila ni'ng kampante gyud nga normal ra ang BP.

Aduna gyu'y tawo nga ingon ini, kay diha'y kausa nga wala ang doktor niya kay nalangan sa giasikasong pasyente didto sa Manila, napugos pag-adto sa laing doctor.

Haskang problemaha, kay naglisud sa pagginhawa nga gitabang, naahat ni'ng na-admit sa ospital. Dagha'g sakit nga komplikasyon sa nerbyos.

Apan katingad-an nga nawala ang mga gipamati niya dihang niabot ang kinaham niya'ng doktor. Matud niya,"Nerbyoso ko'ng kalmado sa ako'ng doktor."