Suya ra si Binay

Gihulagway ni Bise Presidente Jejomar Binay nga drama lang ni Presidente Noynoy Aquino ang wala dayon pagdawat sa resignation letter ni DILG Secretary Mar Roxas.

Matud ni Binay nga wala dayon dawata ni Presidente Aquino ang pag-resign ni Roxas sa katungdanan aron nga makagamit pa kini sa resources sa gobiyerno sa pagpalambo sa iyang kandidatora.

Kun ang paggamit sa resources sa gobiyerno alang sa pag-promote sa kandidatora ni Roxas maoy basehan ni Binay, maayo tingali nga mo-resign ‘sab siya pagka bise presidente aron patas gayud ang ilang kumbati ni Roxas sa moabot nga eleksyon.

Nakalimot ang bise presidente nga sa iyang pagsuroy-suroy sa tibuok nasud aron i-promote ang iyang kandidatora, gigamit usab niya ang resources sa gobiyerno.

Nakalimot tingali si Binay nga ang mga nagkalain-laing butang ug salapi nga iyang gipanghatag ngadto sa katawhan sa mga dapit nga iyang gibisitahan, dili iyang personal.

Ang gikuhaan og budget ni Binay mao ang pundo sa Office of the Vice President. Busa kun aduna may migamit sa resources sa gobiyerno aron i-promote ang ilang kandidatora dili lang si Roxas, kun dili apil na usab si Binay.

Sa pagdawat unya ni Presidente Aquino sa resignation letter ni Roxas, nagpasabot kini nga si Roxas mobalik na sa pribado nga kinabuhi ug sa gasto sa iyang pagpangampanya mokuot na kini sa iyang kaugalingong bulsa.

Busa aron walay makagamit sa salapi ug ubang resources sa gobyerno aron i-promote ang iyang kandidatora kinahanglan nga moluwat usab si Binay sa iyang pagka bise presidente.

Kana kun matinud-anon si Binay sa iyang krusada. Ang ubang kandidato kinahanglan nga mosunod pud kanila.