Diha sa pakigkukabildo

Managtiayon niduol kanako aron kuno magpatambag. Ang lalaki 60 ug ang babaye 22 pa. Ang ilang problema kalabot sa gitawag nilang communication gap. Ang lalaki   naglisud pagtugkad sa gusto sa iyang asawa ug ang asawa usab   naglisud og tugkad sa gusto sa iyang bana. Tuod man nigawas ang resulta kini tungod kay ang bana hilig kaayong mohimo og comparison butang nga dili gusto sa asawa. Mao nga diha sa makabungog nga kahilom nagtinan-away sila apan wa magsinabtanay. Diha sa atong kinabuhi sa pag-ampo, ang pag-ampo atong sabton ingon nga paagi sa pakigkukabildo. Pag-ampo nga nagpasabot og pagpaduol sa Ginoo aron makapaminaw kita sa husto sa iyang buot ipaabot. Sa pag-ampo ang Ginoo naminaw kanato bisan pa man kun ang atong gipangyawit mao ang mga pag-angal ug mga pagmahay. Apan bisan pa niini, ang Ginoo padayon nga mosabot. Ang Ginoo padayon nga mahigugma kanato.