EDITORYAL – Abuso sa katawhan

Matag higayon nga adunay moulbo nga sunog dinhi sa dakbayan sa Sugbo daghan g’yud ang kabalayan nga maugdaw ug gatosan ka pamilya ang mawad-an og pinuy-anan.

Ang rason mao nga dili dayon makasirit ang kabomberohan sa pagresponde aron pagpawong unta sa kayo tungod kay hagip-ot na kaayo ang agianan tungod sa abuso ra usab sa mga lumolupyo.

Gawas nga ang mga hakog nga mga tag-iya og kabalayan mipalapad sa ilang teritoryo ngadto na sa karsada, ang mga karsada gihimo pa nga parking area sa mga sakyanan.

Ang mga opisyal sa kabarangayan gipili unta sa mga lumolupyo aron maoy modala sa ilang tingog ug protehean ang ilang katungod apan wala sila magtuman sa ilang katungdanan.

Kun kini nga batasan sa mga lumolupyo ug sa ilang mga opisyal magpadayon, dili kalikayan nga kaliboan pa ka panimalay ang maugdaw tungod kay maglisud man ang mga bombero sa pagresponde.

Angay na g’yud nga ang mga mabuot nga lumolupyo diha sa kabarangayan maghugpong ug alkontrahan nila ang binuang sa ilang mga silingan nga miukopar sa karsada isip kabahin sa ilang balay.

Kinahanglan usab nga ang katawhan mohimo na og diha-diha nga lakang sa ilang mga opisyal nga maayo lang modawat sa ilang binuwan nga honoraryom apan walay maayo nga serbisyo para kanila.

Dugay ra nga ang kadagkoan sa kabomberohan nag-awhag nga angay gayud nga palapdan ang mga access roads diha sa kabarangayan apan wala pa g’yud kini mapatuman.

Alang sa kasiguroan ug kaluwasan sa katawhan gikan sa laing mga sunog, political will ang atong gikinahanglan.