Di ipadakop ang pushers?

Aniay makapalimbawot sa balhibo. Adunay tabi-tabi nga gi-briefing ang tanang polis sa usa ka heneral kun kinsa ang angay’ng dakpon panahon sa ilang operasyon.

Gimandoan sila sa heneral nga dakpon ang si bisan kinsa nga kriminal nga nakalapas sa balaod gawas sa mga dautang anino nga aktibo sa drug-related activities.

Kun tinuod man kining maong huhungihong, makaluluoy ang atong nasud. Gikan sa bata ngadto na sa tigulang, kasagaran ang utok makulisaw na g’yud. Magtutok sa wala. Ug makig-estorya sa poste nga mag-inusara.

Mahimo na sila nga mga linalang nga patay’ng buhi. Buhi ang ilang lawas apan patay ang ilang kalag. Nagsiga ang ilang mata apan ngitngit ang ilang kaisipan. Pagkaluoy sa ilang kahimtang.

Ang gikahadlokang ilegal nga drugas naghitak na sa atong palibot. Daghan ang namaligya niini. Daghan ang nagnegosyo ug daghan ang users.

Apan maihap lang sa tudlo ang nadakpan. Gani, makauulaw kaayo nga paminawon nga adunay mga tinugyanan sa balaod nga mi-entra niini nga binuanga nga madakpan mismo sa kauban nila’ng polis.

Ngano nga nahitabo man intawon ni? Unsay hinungdan? Ang kawad-on ba? O, ang kagamay sa suweldo sa polis?

Pero, taym pa una. Di ba tanang polis pareho ra ma’g suweldo? Unya, ngano nga may mga polis man nga nindot og balay ug sakyanan? Unya kadaghanan nila, kun dili payag ra’y puy-an, nag-abang man lang intawon?

May relasyon ba kini sa huhungihong nga dili ipadakop ang mga tawo nga miapil sa mga illegal drug activities?

Mao nga imbes mangahadlok ug moundang na sa bisyo kining mga tawhana, nanaghan ug milipang na hinuon? Simbako kun tinuod, pastilan...unsa pa ba ang kaugmaon nga mapaabot sa Pilipinas?