Hinay apan kanunay

Dili dautan kun atong paspasan ang pangwarta basta sa maayo lang nga paagi og dili sa ‘illegal’ o supak sa kagamhanan maingon man sa Kahitas-an. Apan malisud na alang sa tawo, ang kakusog sa iyang tinguha nga makabaton dayon sa dali’ng panahon og pinaspasa’ng dinagko’ng kita o pangwarta.

Ingon nga alang kaniya, angay gyud pahimudsan ang higayon kay kuno usa ni ka oportunidad nga dili magpermi. Mao lagi sab hinuon, apan dili usab kini magdugay nga mahurot dayon, kay kwarta man ni’ng pinaspasan. Mawad-an na man sa maayo’ng panghunahuna sa kabililhon sa pagdaginot sa kwarta. Tungod ini, himoon nato’ng ehemplo ang magtiayo’ng Berto-Elsa (apelyido gitago), nga igo lang nakagradwet sa elementarya. Kalmado nga hinayon kaayo sila sa mga kalihokan sa ilang kinabuhi, nga way kakulba unsa’y dangatan nila. Nga kanunay maghinungitay nga malipayon bisan sa kanihit sa ilang pagkaon.

Kaniadto, alas 7 pa lang sa gabii mangatulog na sila kay mosayo kaadlawon mogikan na’ng maglakaw lang paingon sa ‘carbon public market’. Ilang ipanulod sa sako ang linabay na’ng mga utanon ug prutas. Aduna sila’y kasabot nga mao’y mohakot nga bayaran sila sa negosyante’g herbal nga haplas o lana.

Kugi ray puhunan nila’ng ngitngit pa, tua na pod sila sa laing hugna sa pangwarta. Manugat sa trak nga suki nila’ng may karga sa mga produkto sa kaumahan. Tagakan sila niini nga maoy mosuplay sa mga nakapwuesto’ng manindahay. Inigkahayag may ganansya napod sila apan ginagmay lang tawon.

“Sus, wa gyud  ko kakwenta kun giunsa nako pagpahuman sa kolehiyo ang akong 4 ka anak, taliwala sa dili ma-ilarawa’ng kalisud nga among gipuhonan.”