Mga PUJ pataka lang og hunong

Wala pa man hingpit masulbad ang problema sa kahuot sa trapiko sa dakbayan sa Mandaue, apan naluag-luagan na hinuon og gamay nunot sa One Way traffic scheme sa mga dagku’ng karsada sa mao nga siyudad.

Sa initial assessment sa Operations Head sa Traffic Enforcement Agency Management (TEAM) nga si Glen Antigua iyang gibana-bana nga 75 porsiyento nga pagmenos sa suliran sa trapiko sa una nga adlaw pa lang sa pagpatuman sa one way traffic scheme.

Base lang usab sa akong kasinatian isip mag-agian kada adlaw sa Mandaue City paingon sa dakbayan sa Lapu-Lapu, nabatyagan usab nako ang kausaban, depende tingali sa rota nga subayon.

Anha ko mag-agian sa dalan S.B. Cabahug paingon sa Pacific Mall, dayon liko sa tuo padu’ng sa Marcelo Fernan bridge.

Hinuon, panahon sa peak hours mobug-at g’yud ang build up sa mga sakyanan, apan moving ra man dili sama kaniadto nga matanggong og pila ka oras. Samtang ang nakita lang nako nga problema mao ang kalibog sa mga motorista ug ilabi na sa mga pasahero.

Ang mga pampasahero nga sakyanan usab magpataka lang og hunong nga maoy makaingon sa pagkalangan sa ubang mga sakyanan nga nagsunod nga mosangpot sa paghuot sa traffic.

Busa gikinahanglan nga madeterminar na kun asa ang mga designated area sa Jeepney Stop.

Aw hinuon dry run pa lang ang gihimo karon sa Mandaue City sulod sa 60 ka adlaw ug atong lauman nga mahan-ay ang tanan alang sa mas hapsay nga sitwasyon sa trapiko sa dakbayan sa Mandaue.

Dako pa kaayo ang latason sa gipatuman nga traffic problem solution sa Mandaue apan karon pa lang may malili na nga gamay’ng kahayag.