Si Tommy ug BPOs

Si Presidente Aquino gipaabot nga mopahibalo na ugma adto sa Club Filipino sa kaulohan kun kinsa ang iyang “manok” nga suportahan alang sa presidential elections sunod tuig.

Apan base sa akong nakita sa linihokan sa presidente ug sa iyang mga makapadako sa atay nga pagdayeg ngadto kang DILG Secretary Mar Roxas, klaro na nga si Roxas g’yud ang iyang ituboy.

Matud ni Roxas nga kun ipasa ni Presidente Aquino ngadto kaniya ang bola, dili lang kay iya kini nga i-dribble ug i-shot, iya pa g’yud kini nga i-dunk.

Duha ka butang ang akong nakita ngano nga si Roxas maoy pasahan sa presidente sa pagdala sa renda sa kagamhanan. Una, si Roxas maoy iyang nakit-an nga makapadayon sa iyang nasugdan nga daang matuwid.

Sa daghang katuigan sa pagpangalagad ni Roxas sa gobiyerno, wala gayud kita makadungog nga nalambigit siya og anomaliya. Busa si Roxas ang adunay labing taas og integridad sa mga magpapili pagka presidente.

Gikinahanglan g’yud ang integridad sa usa ka pangulo sa nasud kay kun wala siya niini, dili siya makapaabot nga ang katawhan mosunod kaniya.

Ikaduha, daku na kaayo ang sakripisyo nga gihimo ni Roxas gikan sa iyang paghawan sa agianan alang kang Presidente Aquino kaniadtong 2010 aron tulin kini nga makaabot sa Malakanyang.

Wala man tuod mag-una si Roxas sa mga popularity survey, apan daghan ang nagtuo nga tulin pa unya sa langgam nga manatad nga mosulbong ang rating ni Roxas human siya ituboy ni Presidente Aquino.

Ang mga botante motan-aw g’yud sa katakus sa usa ka kandidato, sa iyang kasinatian sa pagdumala sa nasud.

Wala malilong sa katawhan ang daghang maayong buhat ni Roxas sa pagdumala niya sa mga katungdanan sa kagamhanan diha nga nahimo siya nga senador ug pagka secretary sa lainlaing government agencies.