Daku’ng hagit sa CITOM

Ambot ngano nga maghuwat g’yud kita nga aduna’y mahitabo usa kita molihok ug managana. Mao pa’y atong pag-check sa worthiness sa mga sakyanan sa kadalanan ug kadagatan kun may maaksidente na ug mangamatay.

Karon nga may namatay na ug nangaangol gumikan sa pagkatumba sa poste sa elektrisidad, mao pa’y atong pagpanagana ug paglihok aron kalikayan ang sama nga hitabo.

Ug incidentally, mao pa’y atong pagkamatikod sa pagkapeligroso ug kangil-ad tan-awon sa gubot kaayo nga mga alambre nga mura’g spaghetti.

Dugay na kaayo kini nga talan-awon ug dugay na usab kaayo nga daghan na nga mga nagharag ug katumbahon nga poste sa kuryente ug sa telepono, apan, naghuwat lang g’yud kita nga may mamatay, usa kita mangandam.

Pastilan, Pinoy!

* * *

Atong lauman nga ang bag-o’ng namunoan sa CITOM makabaton og igo nga kaisog pagpatuman sa mga balaud sa trapiko.

Sa ato na nga gibalikbalik dinhi, usa sa nakaingon sa mga problema sa trapiko mao ang pagka-lax sa enforcement, ang pagkahaguka sa pagpatuman sa mga traffic rules and regulations, nga miresulta sa pagka-wala’y disiplina ug pag-abusar sa mga motorista.

Mga traffic signs are totally ignored ug mga ordinansa bahin sa pagpatunhay ug paghatag og sanity sa atong kadalanan, wala mapatuman.

Pananglitan, wearing of crash helmets wala mapatuman, pagpaturagas og pagpalusot-lusot sa mga motorcyclists, gipasagdan lang ni sa taga-CITOM. Dugangan pa g’yud sa kasaba, kay gitangtang ang mga muffler.

Unya, mga PUJ kalitan ka’g overtake ug bisa’g asa mohunong ug dili magpadaplin ini’g pakanaug o mo-pick up og pasahero. Mag-trip-cutting pa g’yud. Kining tanan ug ubang mga violations gipasagdan lang sa taga-CITOM. Pastilan!

* * *

Niay akong nadunggan nga si Lou Arevalo, usa sa ilado nga magsisibya sa among panahon, mobalik pagpanibya sa estasyon dyHP.

Akong nahinumdoman nga usa si Lou sa mga pioneer sa dyHP, panahon ni Lory de la Serna, sa mao pa ang manager.

Niadto’ng panahona, pinaminaw kaayo si Lou kay makalingaw ug siya ang nag-unauna pagkatawa on the air. Dili pareho karon nga tape recorded ang pagkatawa ug usahay bisan og dili kataw-anan mokatawa, that it becomes irritating already.

Kahinumdom ‘sab ko, hope my memory serves me right, nga si Lou ang nagmugna sa jingle o catchword nga “dyHP Haros!”

Basically, ang iyang programa, more on information ug entertainment, ug wala’y pagdaut sa kadungganan sa tawo.

Isip karaan nga tigpaminaw ni Lou ug isip usa usab ka-taga RMN (dxCC, Cagayan de Oro), magpasalamat kita ni Atty. Rhupil Bañoc sa ilang pag-“welcome back” ni Lou.