Police visibility

Mismo si Police Regional Office-7 director Prudencio Tom Bañas ang nangulo sa pagpatrolya sa kadalanan sa downtown area sa dakbayan sa Sugbo sa niaging Martes isip pagpahugot sa kampanya batok sa kriminalidad. Ang mao nga aksiyon mugna usab sa direktiba gikan ni Director-General Ricardo Marquez, ang bag-ong hepe sa Philippine National Police, alang sa pagpangusog sa police visibility sa kadalanan sa tibuok nasud.

Mando ni Bañas nga kinahanglan nga mogahin og oras ang tanang police personnel paggawas sa ilang headquarters aron pagpatrolya sa kadalanan. Kini dili lamang sa dakbayan sa Sugbo kondili sa tanang lugar nga sakop sa PRO-7.

Gumikan niini, makapaabot kita sa presensiya sa daghang pulis nga madestino sa downtown area ning dakbayan sa Sugbo. Ilabina sa dalan Colon diin sukad pa kaniadto naghitak na ang mga badlongon sa katilingban.

Tuod man, sa akong pag-uli gikan sa opisina alas onse sa gabii, adunay daghang pulis nga nadestino sa mga lugar sa Colon. Susama ang ilang gidaghanon matag pahigayon sa night market sa mao nga dalan.   Apan basin kun pakitang gilas lamang kining maong pagpangusog sa visibility sa kapolisan. Tungod lagi kay order man sa bag-ong hepe sa PNP, dali ra usab nga nakatuman ang mga opisyal pagmando sa ilang mga sakop.

Dili ba nga sa pagpatay dili pa lamang dugay sa usa ka magpapatigayon nga giingong nalambigit sa ilegal nga druga, wala g’yuy bisan usa ka pulis nga nagpatrolya sa Colon niadtong tungora. Mao bitaw nga magbahis usab kining mga tulisan, esnatser ug uban pang mga bugok sa katilingban diha sa downtown area tungod usab sa kakulang sa presensiya sa kapolisan ug mga barangay tanod.

Hinuon ato usab nga sabton nga kulang gayud sa personnel ang Cebu City Police Office alang sa insakto nga kampanya batok sa kriminalidad. Ug sa kadako ning dakbayan, maglisod gayud sila pagpatunhay sa kahusay ug kalinaw.

Apan dili usab kana ang rason sa padayon nga pagsiaw niining mga kriminal karon. Dili ba nga maghilak ang adlaw nga walay mahitabong pagpanulis ug pagpanglabni sa kadalanan tungod sa ka luag sa siguridad?

Maayo kining mando pagpangusog sa police visibility sa kadalanan. Dili malalis nga usa kini ka paagi pag-discourage sa mga kriminal pagpahigayon sa ilang binuhatan.