Gub-on nila si PNoy

Tungod sa kasikat ni Presidente Noynoy Aquino, tumong karon sa iyang mga kontra sa politika nga mahimo siya nga baho ngadto sa katawhan.

Kini ang akong gituohan nga anaa karon sa huna-huna ug sa war room sa iyang mga kaaway sa politika.

Kun dili gud maguba ang kasikat ni Presidente Aquino ngadto sa katawhan, magkaproblema ang iyang mga kaatbang sa politika kay segurado man g’yud nga mokubit ang mga tawo sa iyang i-endorso nga kandidato nga pagka presidente.

Mao kini ang hinungdan nga gigamit gayud sa mga kaatbang sa pangulo ang isyu sa Mamasapano kay dili man g’yud sila basta-basta nga makapaus-os sa kasikat ni PNoy tungod sa daghan niya’ng nahimo nga nakapalambo sa ekonomiya nga wala pa gihapon mabatyagi sa katawhan.    

Kini’ng akong obserbasyon napamatud-an na sa panahon ni kanhi Presidente Cory Aquino diin midaog ang kandidato nga iyang giendorso nga si Fidel V. Ramos.

Ang kasikat ni Cory ug ang makinarya sa iyang partido ang nakapadaog ni Ramos kinsa bag-o pa lang sa politika kun imong itandi nila ni kanhi Speaker Ramon Mitra, Miriam Santiago, Jovito Salonga ug ubang bug-at sa politika.

Kinsa ba ang magtoo nga mapilde si Mitra kansa’ng partido nga Laban ng Demokratiko’ng Pilipino (LDP) miabot bisan sa kabarangayan lukop nasud.

Ang kasikat ni Cory maoy usa sa nakatabang sa pagdaog ni Ramos. Mao usab kini ang akong gituohan nga nahadlok ang mga kaatbang ni PNoy sa politika, ilabi na gayud kadto’ng nangambisyon nga mahimong presidente sa nasud.

Nahadlok sila nga si DILG Secretary Mar Roxas nga gikatakda’ng ituboy PNoy mao unya ang modaug tungod sa endorsement sa pangulo kaniya.