Hawok sa sampot

Duha karon ang mayor  sa siyudad sa Makati. Bisan sa suspension order sa Ombudsman nga gipakanaog batok sa anak ni Bise Pres. Jejomar Binay nga si suspendidong mayor Jejomar Erwin “Junjun” Binay, nagmagahi kini sa pagkanaog, miaplay ug nakakuha og temporary restraining order.

Sa laing bahin, ang bise mayor ni Junjun Binay nga si Romulo “Kid” Peña milingkod usab isip acting mayor human gipapanumpa sa mga opisyal sa Department of Interior and Local Government.

Kagahapon lang, gibalita sa Philippine STAR nga nakadaot sa payroll sa 8,000 ka  empleyado sa Makati City Hall ang presensiya sa duha ka mayor. Kini samtang ang Department of Finance motudlo pa og tresurera tungod kay ang tresurera sa pamunoan ni Junjun Binay naapil sa pagkasuspenso tungod sa kasong overpricing sa Makati Parking Building.

Samtang ang Ombudsman ug si Justice Secretary Leila de Lima pabor sa paglingkod ni Peña isip acting mayor, ang kampo ni Junjun Binay padayong nagmagahi sa pagkanaog. Naglibog ang mga empleyado sa Makati kinsay ilang tuohan. Samot na ang mga negosyante sa Makati nga napiit sa proxy war tali nilang Bise Pres. Binay ug ni DILG Sec. Mar Roxas.

Sama sa Ombudsman, Department of Justice ug DILG, nakita nako nga “moot and academic” na ang TRO ni Junjun Binay tungod kay naabot kini nga nakalingkod na si Peña isip acting mayor. Ang buot ipasabot niini nga wala nay angay i-restrain ang Court of Appeals kay nasapawan na og laing sitwasyon ang order niini – na-serve na ang suspension order ug nakapanumpa ang bise mayor isip “temporary successor.”

Ang naguolan lang nako nganong misawsaw pa gyud ang Integrated Bar of the Philippines pinaagi sa pagsaway nilang De Lima ug uban pa nga mipakanaog og opinyon nga nagpabor sa paglingkod kang Peña. Abi kay si Binay man ang ilang pinasidunggang dinapit sa IBP national convention sa Waterfront Hotel, kinahanglan ba gud nga mohawok sa sampot sa bise presidente ang mga abogado?

Ang mga abogado eksperto kaayo unsay prinsipyo nianang “moot and academic.” Ang nakaparat lang sa atong sistema kay ang gustong mo-aplay niini magdepende kinsa ang labanan. Abi kay si Binay man ang ilang bisita sa convention, dili maaplay sa kaso ni Peña ang “moot and academic?” Kun lain pa tingale ang kontra ni Peña, aduna kahay statement ang IBP pagsaway kang De Lima?

Ang TRO maayo lamang kini kun adunay dinaliang buhat o desisyon nga angayang pugngan sa korte kay kun dili mapugngan, makadaot kini sa katungod sa  reklamante. Unsa may pugngan kun nakalahos na?