EDITORYAL – Daghan ang nagduda

Nakabantay ang mga motorista nga paspas karon ang pagpang-aspalto sa mga karsada dinhi sa dakbayan sa Sugbo pinaagi sa Department of Public Works and Highways (DPWH).

Apan natan-aw sa katawhan nga mura’g giusik-usikan lang ang kuwarta kay bisan ang mga karsada nga maayo pa giguba lang g’yud aron aspaltohon pagbalik. Ang mga motorista nakabantay nga daghang mga karsada nga bati kaayo wala hinuon ayoha sa DPWH, sama sa tumoy nga bahin sa Arellano Boulevard atubangan sa Philippine Coast Guard  (PCG) headquarters.

Adunay nagduda nga dili kaha gipugos lang g’yud paggasto sa DPWH ang kuwarta bisan og maayo pa ang karsada aron makadawat sila og komisyon gikan sa mga kontraktor?

Daghang mga karsada dinhi sa dakbayan nga bati kaayo ug masakripisyo ang dagan sa mga sakyanan apan dili kini mahimo nga gastohan sa DPWH kay wala makakuha sa ilang standard nga gilapdon.

Dili ba mas nindot nga palapdan nila ang mao nga mga karsada nga daghan kaayo’ng moagi nga mga sakyanan ug isipon na kini nga national road aron ang DPWH na ang mogasto pagmintenar niini?

Apan ngano nga wala man unaha sa DPWH ang pag-aspalto sa M.J. Cuenco Avenue gikan sa Carreta paingon sa barangay Mabolo nga puwerte’ng batia? Ngano nga giuna man nila ang Gorordo Avenue duol sa eskena Gorordo Avenue nga nindot pa man kini kaayo?

Kun nahadlok ang DPWH nga mabalik sa General Fund ang kuwarta nga gipiyal kanila kun mapupos na ang termino ug dili nila magasto ang kuwarta, mas maayo pa nga gigasto nila kini pagbayad sa yuta nga magamit sa pagpalapad sa karsada.