Lisod ba’ng mangayo og pasaylo?

Opisyal na nga mipagawas sa report ang tulo ka kumite sa Senado mahitungod sa engkwentro tali sa sakop sa Special Action Force sa kapolisan ug mga rebelde’ng Muslim didto sa Mamasapano, Maguindanao kaniadtong Enero.

Ug ang nakab-ot nila nga konklusyon: kinahanglan nga moadmiter si Presidente Benigno Aquino III sa dakong sayop ug moangkon sa responsibilidad sa maong operasyon nga miresulta sa kamatayon sa 44 ka sakop sa SAF. Usa sa nakita sa mga kumite mao ang dakong bulilyaso sa presidente tungod kuno sa iyang pagpakigsabot kang Heneral Alan Purisima mahitungod sa operasyon sa SAF bisan pa man nga suspendido ang hepe sa PNP.  

Hinuon, tak-om ang baba ni Aquino kabahin sa maong Senate report. Bisan pa man sa depensa sa iyang mga alipures, mora’g dili kita makakita ni Aquino nga mobarog unya sa pulpito ug mangayo og pasaylo.

Apan mibukal na kining panawagan alang kang Aquino pag-admiter sa iyang kasaypanan sa mao nga insidente. Daghan ang miingon nga isip commander in chief, angay niya nga angkonon ang sayop sa maong insidente.

Mialsa na usab ang mga militante. Ug nagkadako na hinuon kining panawagan alang sa resignasyon ni Aquino. Gani human sa maong insidente, grabe karon ang pagkahagba sa approval rating sa presidente. 

Mismong si kanhi presidente Fidel Ramos ang nanawagan alang kang Aquino nga mohimo og susama kang kanhi presidente Gloria Arroyo kinsa miatubang sa katawhan aron pagpangayo og pasaylo mahitungod sa kontrobersiya sa Hello Garci Tape.

Matud ni Ramos nga walay mawala ni Aquino kun mohimo siya niini. Bisan pa man kun aduna nay damage nga nahimo ang presidente, ang pagpadayag og public apology usa kuno ka paagi paghubas sa pressure mugna sa maong insidente. Apan dakong pangutana karon kun mosunod ba si Aquino sa gihimo ni Arroyo kinsa nagpahiubos ug nangayo og pasaylo sa katawhan.

Dili ba nga sukad pa sa iyang pagsugod pagpuyo sa Malacañang, nagsige na og paghot si Aquino kang Arroyo gumikan kuno sa mga kahiwian sa nakalabay nga administrasyon?

Abir, ato lamang atangan kun kaya ba usab ni Aquino ang mangayo og pasaylo sa katawhan.