Ang klima sa isla (2)

Ang gagmay nga isla, hayahay kaayo kun normal ang panahon. Apan bisan pa ini, bantang kaayo sila sa subra kabugnaw ug kainit. Bentaha lang kun init ang panahon, dili ka bation og kainit tungod   kay gilapyos sa hanging mabugnaw ang kainit, apan diay nangahilos na ang panit.

Mao na nga kasagaran sa nagpuyo dinhi, nga gipalibutan sa dagat nangaitom gyud. Kay permi gidangka sa hilabihan nga kabugnaw ug sa kainit. Ilabi nas kagabhion, di masabot ang alimuot nga hilabihan katugnaw nga bisan magbukot tugnawon gihapon nga panington. Busa apektado gyud ang lawas.

Gawas nga magdaut ang panahon, nindot baya puy-an ang isla. Ingon sa batyagon ang kahayahay sa panghunahuna, nga naglantaw sa kinaiyahan nga duol sa kahitas-an. Way motandog nga kasakit gawas sa mamingaw nga palibot. Unya ato lang sab lingawon ang kaugalingon. Buhion kanunay ang paglaum ug ang maayong panglawas. Kini ang islahanon nga malipayon.

Aron di maughan ang tutonlan o kaha mabugnawan ang tiyan, malagmit panuhoton, plemahon ang dughan o ang likod manakit, inom kanunay og init nga salabat (linaga sa duwaw o luy-a nga yellow) aron depensa sa subrang klima sa init o tun-og. Permi magsabaw nga may kamunggay, tangad, luy-a, duwaw, ahos, nga magsilbing panagang sa dugo di mobagtok, tibugol sa plema sa baga, dughan ug sa ilong. Ug aron sad di motikig ang atong arterya.

Ang pagkao’g lato o guso maayo kaonon, kay makahatag nig suplay nga 'oxygen' alang sa sirkulasyon ug paglig-on sa sistima sa imyun.

Ayaw palabi sa pansat, kasag, pasayan ug uban pa, aron di manakit ang lawas tungod kay grabe kini sa uric acid nga mamula (inflammed) manakit ang kalawasan.