Eskandalo sa suweldo

Disyembre pa sa niaging tuig nga mahimong usbawan ang minimum nga suholan sa mga trabahante sa Sugbo, Bohol, Negros Oriental ug Siquijor. Apan way bisan usa ka sakop sa Regional Tripartite Wages and Productivity Board (RTWPB), apil nang duha ka representante sa labor sector, ang nikihol sa pagsubli sa suholan atubangan sa padayong pagsaka sa presyo sa mga palaliton ug ubang inadlaw nga mga panginahanglan.

Karon na lang motakda ang RTWPB 7 og tigom nga mosusi sa ekonomikanhong kahimtang sa rehiyon dihang, sama sa naandan, naunhan na sab sila sa mga sakop sa RTWPB sa Metro Manila. Kinsa niaprobar og P15 nga umento sa minimum nga suholan sa niaging semana.

* * *

Wa pa gyud diay maleksiyon ang mga sakop sa RTWPB 7 sa makauuwaw nga kasaysayan sa suholan dinhi sa ato tungod sa ilang:

"Katapolan. Kanunay lang tang maiwit sa pagpausbaw sa minimum nga suholan, kanunay lang tang maapsan di lang sa National Capital Region kun dili hasta na sa mas gagmay nga mga rehiyon;

" Katalawan. Mahudlat dayon ang mayoriya nila sa hudlat sa mga negosyante nga manira ang ilang mga kompaniya kun ihatag ang mas dakong umento sa minimum nga suholan; ug

"Pagpusta sa pikas. Ang mga representante sa gobiyerno kanunay’ng modapig sa mga negosyante di lang sa botasyon kun dili sa pagpakita og mga numero nga sukwahi sa pangangkon sa ilang nasudnong mga buhatan sa dakong paglambo sa ekonomiya.

* * *

Kay mora og di man gyud tang kalaom sa RTWPB 7 nga motuman sa ilang trabaho sa makiangayong pagsubli sa suholan, magpaabot na lang ang mga anak sa singot og mas makiangayon nga paglambo sa ilang suholan ug benepisyo gikan sa mga puwersa sa merkado. Duha ka pananglitan:

" Ang lumba pagtukod sa bag-ong mga tambalanan nisangpot sa dakong usbaw sa suholan sa nurses ug ubang mga kawani. Wa pa mahuman pagtukod nga ospital gikatahong nipilo og katulo sa suholan nga ilang gitanyag maong nakuha nila ang hapit tanang beteranang nurses ug mga kawani sa nag-unang mga tambalanan; ug

" Ang nanguhong nga bag-ong kumpetensiya nakakuha sa mga kawani sa labing luhong hotels ug resorts kansang suholan nalansang sa daghan nang katuigan.

* * *

Hinaut nga kun huwasan na sa hilanat sa Mamasapano ug sa di pa takboyan sa mas grabeng tipos sa piniliay sa 2016, makaamgo ang mga senador ug mga kongresista sa dinaliang panginahanglan pagsubli sa nagkatuiris nga mga suholan sa nagkalainlaing rehiyon, salamat sa pataka sa RTWPBs. Di makiangayon nga magpabiling labaw og kapin sa P100 ang minimum nga suholan sa Metro Manila kay sa Sugbo ug ubang rehiyon.

Ang gahom pagtakda sa suholan iya sa Kongreso. Nga igo lang gipahuwaman sa RTWPBs. Mahimong bakwion bisan unsang higayona. Sama karon.