Sa pagtibugsok sa pagsalig sa pamuno nasud

Nakasinati karon si Presidente Benigno Simeon Aquino III og dako kaayong pagtibugsok sa iyang trust rating sa katawhan dinhi sa nasud base sa bag-o lamang nga gipagawas nga survey sa Pulse Asia ug Social Weather Station nga mga survey.

 Sa survey sa Pulse Asia niadtong Nobyimbre sa miaging tuig ang iyang approval rating gikan sa 59 porsiyento ngadto na lamang sa 38 porsiyento ug sa susama gihapong mga bulan nga pag-survey  ang iyang trust rating gikan sa 56 porsiyento ngadto na lamang sa 36 porsiyento. Kini dako kaayong sukwahi sa mga resulta sa miaging mga survey sa miaging mga tuig sa Pulse Asia  SWS sa nangaging mga tuig sa iyang paghupot sa katungdanan isip presidente sa nasud nga diin iyang gipahimuslan ang taas kaayong pagsalig sa katawhan ngadto kaniya sa iyang paghupot sa katungdanan.

Sa gipagawas nga survey niadtong Lunes maoy nakita nga resulta ang dako kaayong pagkunhod sa performance rating sa presidente gikan sa 70 porsiyento mitibugsok kini ngadto na lamang sa 56 porsiyento ug ang trust rating gikan sa 69 porsiyento ngadto na lamang sa 53 porsiyento.

 Si Pulse Asia Research Director Ana Maria Tabunda miingon nga ang resulta sa labing ulahing survey nga ilang gihimo maoy labing ubos kun itandi sa resulta sa mga survey nga ilang gihimo sa nakalabay nga upat ka tuig nga paglingkod ni Presidente Aquino sa katungdanan. Kini maoy kinadak-ang pagtibugsok sa approval, trust rating ug bisan sa performance rating sa presidente, base sa mga resulta sa mga survey nga gihimo sa nangaging katuigan.  Kining namatikdan karon nga pagtibugsok sa pagsalig sa katawhan sa kasamtangang administrasyon ni Presidente Aquino mao kini ang nahimong dakong balit-ad sa nangaging katuigan sa iyang paghupot sa katungdanan  diin maoy gipasiatab niini ang “ Walang Wang-wang, Daang Matuwid, Kayo ang Boss Ko, Kung Walang Kurap, Walang Mahirap.”